Ende pa përfunduar tërësisht, sheshi Skënderbej është kthyer tashmë në një nga pikat më atraktive të kryeqytetit duke tërhequr vëmendjen jo vetëm të qytetarëve shqiptarë, por edhe të turistëve të shumtë të huaj. Kryeministri Edi Rama postoi në profilin e tij në Facebook, një foto të qendrës së kryeqytetit tek “Sheshi Skënderbej”, i cili është drejt fundit, duke e krahasuar sheshin aktual me atë të vitit 2013.
“Mirëmëngjes! Dhe me këtë imazh të Sheshit “Skënderbej” në 2013 dhe sot, ju uroj një ditë të mbarë me bindjen se edhe pak javë do të ndjeheni të gjithë krenarë, pa dallim bindjesh a simpatish politike, për qendrën e kryeqytetit tonë, shtruar me qilimin e gurëve nga të gjitha trojet shqiptare e nga krejt krahinat e Shqipërisë. Ky shesh do të jetë kartvizita e bukur e Shqipërisë që duam!” shkruan Rama.
Një shesh për qytetarët, shtruar me gurë dekorative nga gjithë trojet shqiptare, lule, pemë, shkurre dekorative nga gjithë vendi, ndriçuar nga panele diellore dhe me shatërvanë që do të furnizohen nga uji i shiut. Kjo është ajo që do të shohin shumë shpejt kryeqytetasit dhe vizitorët në përfundim të punimeve për sheshin “Skënderbej”.
ma.me
