Ish-presidenti Ilir Meta e ka cilësuar kryeministrin Edi Rama përgjegjësin e vetëm të vjedhjeve marramendëse që kryen në vendin tonë për falsifikimeve si në rastin e Inceneratorëve.
Meta u shpreh se Rama u del garant të vetëve që të hedhin firmat dhe më pas u thotë të bëjnë disa muaj burg deri në lirimin për arsye shëndetësore.
Sipas tij, Rama është përgjegjësi për mashtrimet me sistemin bankar dhe tatimet ndërsa shtoi se atij nuk i duhet lënë asnjë sekond kohë.
“Edi Rama do të blejë kohë dhe nuk i duhen lënë kohë sepse çdo sekond kohë borxhi shkon kacafiu, Borxhi shkon lart e më lartë, të rinjtë marrin rrugët e botës. Atij nuk mund t’i lihet asnjë sekond kohë. Sjellja e tij me vendin është tërësisht kriminale. Janë falsifikuar statistikat për COVID. Numri i të vdekurve është shumë herë me e lartë.
Si këtu falsifikohet firmat e tyre që kanë ikur nga kjo botë për të kryer vjedhje marramendëse. Kush i përfshin të gjithë sistemin bankar, me tatime, kush i bën këto? Këto i bën vetëm Edi Rama. Nuk ka këtu ndarje përgjegjësie me asnjë tjetër. Të gjithë këta janë viktimat e arrogancës së tij. Se ju thotë firmosni ju se ju dal unë për zot. Se dhe pak burg do bëni dhe ju nxjerr unë për arsye shëndetësore. Ai merr peng bashkëpunëtorët e tij dhe kërkon të marrë peng të gjithë vendin”, u shpreh ai në Open.
Ai komentoi edhe ndryshimet e fundit në qeveri të firmosura nga kryeministri Edi Rama. “Nuk e di si mund të hiqet një kryenegociator që është caktuar të drejtojë negociatat kur negociatat mund të fillojnë. Ai është për negociatat. Për këto tjerat këto nuk kanë asnjë rëndësi. Ne nuk kemi asnjë ministër, Kemi vetëm kryeministër. Zv/ministri është gjoja ministër. Ndryshim kozmetik. Lojëra dhe humore oborri”, deklaroi Meta.
/e.d
