Kryeministri Edi Ramaka zhvilluar sot një takim me Zv/ Presidentin e Shteteve të Bashkuara të Amerikës, Mike Pence.
Takimi është zhvilluar gjatë punimeve të Samitit të Kartës së Adriatikut, që po mbahet në Malin e Zi.
“Në Mal të Zi me zv.Presidentin e SHBA, Mike Pence, dhe liderët e rajonit tonë për Samitin e Kartës së Adriatikut. Zv.shefi i Shtëpisë së Bardhë nënvizoi fort, interesin e Shteteve të Bashkuara për të forcuar bashkëpunimin me vendet e rajonit, si edhe domosdoshmërinë për të rritur ndërveprimin mes SHBA e vendeve të rajonit e po ashtu mes vetë vendeve të rajonit, në funksion të përballimit me sukses të sfidave të sigurisë, paqes e prosperitetit, në rajon e në Europë”, shkruan kryeministri Rama në Facebook, teksa ka publikuar edhe një video nga takimi.
“Takimet bilaterale me zv.Presidentin Pence, si edhe me liderët e tjerë të rajonit, patën rëndësinë e tyre të posaçme për rikonfirmimin e vullnetit për të ecur më tej përpara, të gjithë së bashku, në mbrojtje të interesave strategjike të popujve tanë”, thekson kryeministri Rama.
