Kryeministri Rama ka deklaruar se lista e kandidatëve të PD-së për deputetë është diskriminuese ndaj grave. Duke iu referuar edhe vendimit të KQZ që gjobiti PD-në për moszbatimin e kuotave gjinore, u kërkoi grave dhe vajzave që të mos votojnë PD. Gjatë një takimi elektoral në Burrel, Rama tha se për herë të parë arritëm një përfaqësim 50 me 50 të grave në qeveri, ndaj të mos lejojmë të kthehemi tek oda e burrave të Saliut.
“Në 4 vitet e ardhshme do bëjmë shumë më tëper se këto 44 muajt e qeverisjes tonë. PD kërkon votën në emër të republikës së re, por ka paguar gjobë për mungesë grash dhe vajzash në listat e shumë qarqeve. Sipas PD nuk ka gra e vajza të denja për të përfaqësuar, Kukësin, Beratin, Gjirokastrën, Lezhën dhe Fierin. Në gjithë këto qarqe vetëm burra, e çfarë burrash. U thëm grave dhe vajzave të mos e votojnë PD-në. Mos lejoni PD-në që ti tratojë gratë si qenie të kategorisë së dytë. Arritëm një qeveri me 50% gra e 50% burra, mos pranoni të kthehemi tek oda e burrave të Saliut”, tha Rama
Rama kërkoi edhe njëherë një mandat të fortë qeverisës, pa forca të tjera politike që luajnë timonin gjatë rrugës së të bërit reforma. Të shpëtojmë Shqipërinë nga Basha dhe PD-ja, theksoi Rama, ndërsa shtoi se 25 qershori duhet të jetë dita jonë kuqezi.
“Hodhem themelet e të bërit shtet. Në 25 qershor, do të vendosim mes ngritjes së shtëpisë tonë mbio themelet që hodhem, apo do të kthehemi pas. Do të votojmë për të marrë njerëz në punë, apo për ti dhënë punë Lulit. Duam një mandat të fortë që të mbajmë vetëm timonin dhe të mos mbajmë forca të tjera që luajnë timonin rrugës së të bërit shtet. U dhamë mundësi të gjithëve të futën në zgjedhje dhe demokratët na kanë një borxh. Tani të shpëtojmë Shqipërinë nga Luli dhe PD-ja. 25 qershori duhet të jetë dita jonë kuqezi për flamurin e Skënderbeut dhe Ismail Qemalit dhe jo dita e flamujve politikë”, tha Rama.
Kryeministri deklaroi se nuk mund të pranojmë të rikthejmë Lulin në pushtet, pasi e kemi shembullin e punës së tij në bashkinë e Tiranës, ku nuk bëri asgjë.
“Si mund të pranojmë që të rikthejmë Lulin në qeveri. Pyesni Tiranën për Lulin. 4 vjet nuk bëri asnjë punë, as sahatin e Tiranës nuk e ndryshoi, ndërsa oren e vet e la 12:00. Basha flet për palmat dhe investime në qytete, por vetë nuk bëri asgjë. Rilindja urbane solli një frymë të re edhe për qytetet e braktisura”, tha Rama.
Rama tha se vettingu dhe arsimi janë dy shtyllat kryesore për zhvillimin e vendit. Siç fituam betejën me vettingun, do të fitojmë edhe betejën me punësimin e të rinjve dhe rritjen ekonomike, tha kryeministri.
“Drejtësia dhe arsimi, shtyllat kryesore për zhvillimin e vendit. Siç fituam betejën me vettingun, do të fitojmë edhe betejën me punësimin e të rinjve dhe rritjen ekonomike. Vettingu është i lidhur ngushtë me zhvillimin ekonomik të vendit, ndaj luftuam për të”, tha Rama./javanews.al/a.ç
