Familjarë të katër të vrarëve të 21 janarit kanë nisur një takim me kryeministrin Edi Rama në zyrën e tij, me rastin e 5 vjetorit të ngjarjes. Si sot pesë vjet më parë, në protestën e opozitës, tani në pushtet, u vranë Hekuran Deda, Aleks Nikaj, Ziver Veizi dhe Faik Myrtaj. Të afërmit e tyre kanë takuar kryeministrin, pa praninë e medias.
Më pas, ashtu siç kanë bërë edhe vjet, ata do të dalin për të nderuar në bulevardin “Dëshmorët e Kombit”, 4 të rënët, pikërisht në vendet ku ata humbën jetën 5 vjet më parë.
Pas kaq vitesh, ende nuk është bërë drejtësi për autorët kryesorë që urdhëruan dhe që kryen vrasjet.
Në fund të vitit 2014, kryeministri Edi Rama deklaroi në përgjigje të pyetjeve të gazetarëve se: “Ne si qeveri do të bëjmë ç’është e mundur për të lehtësuar rrugëtimin në jetë të fëmijëve të familjeve të viktimave. Sa i përket drejtësisë, unë vazhdoj të jem i bindur që drejtësia mbi 21 janarin do të vonojë, por nuk do të harrojë. Reforma në drejtësi do të ndihmojë edhe në këtë drejtim”.
Me një vendim të posaçëm, vjet në 21 janar, qeveria akordoi nga një pension për katër familjet në masën e 500 dollarëve secili. Megjithatë, familjarët nuk rreshtin duke kërkuar që të dënohen autorët e vrasjeve.
