Kryeministri i Shqipërisë, Edi Rama i shoqëruar nga ministra dhe deputetë, ishin sot në Prishtinë në përurimin e shtatores së Ismail Qemalit në këtë qytet.
Rama dhe kryetari i Komunës së Prishtinës, Shpend Ahmeti kanë zbuluar shtatoren e Ismail Qemalit në Prishtinë. Ismail Qemali, i cilësuar si “Babai i Kombit”, tanimë ka një shtatore përpara qeverisë së Kosovës.
Para të pranishmëve mbajtën fjalë kryeministri Rama dhe kryekomunari i Prishtinës, Ahmeti.
Rama tha se vendosja e shtatores së “atit të kombit” ishte një mision që duhej përmbushur pasi në vetëvete kjo ceremoni është një rishpallje e pavarësisë dhe sovranitetit të shqiptarëve.
“Sa herë që një shtatore e Plakut të Madh lartësohet para nesh, është pavarësia dhe sovraniteti i shqiptarëve që rishpallet”, tha Rama.
Kryeministri Rama theksoi se bashkimi i Shqipërisë dhe Kosovës nuk është çështje kufinjsh, por çështje integrimi. Rama theksoi se bashkimi ynë është çatia e përbashkët e Europës, për të përmbushur amanetin e Ismail Qemalit:
“Shqiptarët të bashkuar në Europën e bashkuar.
Nuk kemi ndërmend të shkelim fjalën që u kemi dhënë SHBA dhe BE për bashkim, përveçse në BE. Edhe me fqinjët e tjerë duam të bashkohemi nën çatinë e përbashkët të Europës. Amaneti i Ismail Qemalit ishte: shqiptarët të bashkuar në Europën e bashkuar. Dhe askush nuk mund t’i përpijë shqiptarët”, tha Rama.
Projekti për vendosjen e bustit të Ismail Qemalit në Prishtinë dhe më pas të vendosjen e bustit të Hasan Prishtinës në Vlorë është prezantuar që në vitin 2014, gjatë takimit ë kreut të komunës së Prishtinës, Shpend Ahmeti me një delegacion intelektualësh nga qyteti i Vlorës.
