Kryeministri Edi Rama ndodhet në Izrael në kuadër të një vizite zyrtare. Gjatë ditës së djeshme ai zhvilloi një vizitë në Muzeun e Holokaustit. Kreu i qeverisë postoi disa foto nga kjo vizitë, të shoqëruara me një koment ku heq një paralele me bunkerin e djegur pranë Ministrisë së Brendshme.
“Çfarë mësimi i paçmuar për çdo individ dhe popull për mënyrën se si duhet të mbajë gjallë kujtesën e vuajtjeve që nuk duhet të përsëriten kurrë! (E pashmangshme të mos vajtosh nivelin mizerabël të kuptimit për rëndësinë e të shkuarës në vendin tonë, ku verbëria e injorancës ushqen debate e nxit përplasje idiotike kundër muzealizimit të së shkuarës…
Të shohësh flamurët origjinalë hitleriane dhe vetë kasapin e popullit hebre që shfaqet i gjallë, sot e gjithë ditën përmes ekraneve të Muzeut të Holokaustit, dhe të mendosh se ç’bëjnë të verbërit në mexhelisin e politikës shqiptare kundër shëmbëlltyrës së një bunkeri si hyrje e muzeut të persekutimeve e torturave të Sigurimit të Shtetit, është për të vënë duart në kokë nga trishtimi e zemërimi bashkë!”, shkruan Rama.
