Në një takim me qytetarë dhe mbështetës, Partia Socialiste ka prezantuar sot kandidatin Andi Salla në Bashkinë e Cërrikut.
Ka qenë Taulant Balla ai që ka hapur takimin, ndërsa u shpreh se ‘sahati i qytetit ka mbetur që kur LSI u bashkua me PD”.
Ndërkohë që kryeministri Edi Rama u shpreh se qeveria do t’i shumfishojë investimet për këtë qytet, i cili deri më sot drejtohet nga LSI.
“Ma mori Taulanti hapjen e fjalës, sepse gjëjeja e parë që më ra në sy kur po vinim ishte sahati. Është interesant, sepse tama kështu e la edhe Luli sahatin e Tiranës para se të ikte. Katër vjet kryetar bashkie, Luli e kishte sahatin mbi zyrë” – ironizoi Rama.
Kreu i PS u shpreh se sapo LSI u bashkua me Lulin, i ngeli ora.
“Tani duan që e gjithë Shqipëria të punojë me orën e tyre, pa akrepa dhe që tregon një kohë të shkuar. Ata mendojnë se do të na imponojnë logjikën e kapsollave edhe molotovit. Një gjë ta keni të sigurtë, se ata janë të lirë të vendosin për veten e tyre. Por nuk vendosin dot asgjë tjetër për ne dhe për Shqipërinë” – tha kryeministri në Cërrik.
Rama tha se zgjedhjet pa opozitën PD-LSI nuk janë aspak demokratike.
“Meqë ata kanë dalë mendsh ne nuk duhet të ecim në parimin se budallait i duhet hapur rrugë. Por kjo është një histori që nuk do të kishte fund dhe zgjedhjet do të ktheheshin në të drejtën e partive për të luajtur me kushtetutën si top prej lecke. Kjo nuk mund të bëhet! Zgjedhjet do të bëhen më 30 Qershor. Imagjoni çfarë do të ndodhte sikur të pranonim imponimin e logjikës së dhunës.” – tha kryeministri.
Ai ironizoi edhe dhunën në protestat e opozitës.
“Ata kanë një problem, nuk rrinë dot pa dhunë. Dhe kur nuk u del njëri përpara, rrahin njëri-tjetrin. E patë sesi u rrahën baba e bir me shufra hekuri. Sepse ata nuk kanë asgjë për t’ju ofruar përveç dhunës, shantazhit, kërcënimit. Janë shumë të trembur nga reforma në drejtësi” – tha Rama në Cërrik.
/a.rada
