Bashkimi Europian ka vendosur t’i heqë të gjitha masat ndëshkuese ndaj Kosovës deri në fund të muajit të ardhshëm, duke i mundësuar vendit të përfitojë miliona euro ndihmë financiare që në fillim të vitit 2026. “Rrjedhimisht, edhe fondet do të zhbllokohen, një pjesë shumë e madhe menjëherë e një pjesë tjetër në fund të janarit” tha vet presidentja Vjosa Osmani përmes një video live dje nga Samiti mes liderëve të Ballkanit Perëndimor dhe atyre të Bashkimit Europian.
Teksa ishte duke ndarë këtë lajm të mirë për popullin e Kosovës, fjala e saj “është ndërprerë” nga kryeministri Edi Rama.
I cili ka thënë: “Kjo gru ka qënë e jashtëzakonshme sot! I ka zhblloku të gjitha fondet e bllokume për kaq kohë dhe leje se ça thotë ‘kemi lajme’ se s’kemi lajme ka kjo lajme dhe është merita e saj 100%, bravo të qoftë. Ti e di që unë s’të du por realitetin duhet me e thonë”.
Shoqëruar me të qeshura Osmani i ka thënë “Po realitetin duhet me e thonë”. Teksa falenderon edhe Shqipërinë, dhe kryeministrin për përkrahjen.
Këto masa ndëshkuese tashmë të hequra i kishin kushtuar Kosovës rreth 613.4 milionë euro në projekte të pezulluara ose të shtyra për afat të pacaktuar. Për shkak të kalimit të afateve, 7.1 milionë euro janë humbur tërësisht, sipas një analize të Institutit për Studime të Avancuara – GAP.
Sektorët më të prekur përfshijnë mjedisin, me 350 milionë euro, energjinë me 114 milionë euro, digjitalizimin me rreth 57 milionë euro, dhe kulturën me 15 milionë euro.
Prej këtyre fondeve, rreth 218 milionë euro kanë qenë për projekte në kuadër të Instrumentit para-anëtarësimit (IPA II dhe IPA III), dhe rreth 395 milionë euro për projekte në kuadër të Kornizës për Investime të Bashkimit Evropian për rajonin e Ballkanit Perëndimor (WBIF).
