Në fillim të muajit tetor, Partia Socialiste do të mbledhë sërish Asamblenë për të zgjedhur kryesinë e re dhe sekretarët.
Në mbledhjen e grupit parlamentar socialist Edi Rama foli edhe për një marrëveshje mirëkuptimi që do të nënshkruhet mes kreut të grupit, Sekretarit të Përgjithshëm dhe ministrave, e që më pas do t’i shpërndahet deputetëve. Kjo marrëveshje, sipas Ramës, vendos çdokënd në pozicionin e vet në raport me të drejtat dhe detyrat e tij në parti dhe grup.
Një tjetër nismë e kryeministrit është mbledhja e qeverisë përgjatë një sesioni parlamentar një herë në çdo qark për të punuar bashkë me deputetët, drejtuesit vendorë dhe komunitetin.
Kryesia e Partisë Socialiste i ngarkoi sot Sajmir Tahirit detyrën e koordinatorit në terren për bashkëqeverisje me qytetarët. Rama ka kërkuar respektim të rregullores nga të gjithë deputetët, ndërsa në seancat e të enjtes është kërkuar prania e përhershme nga i gjithë grupi parlamentar.
Grupi Parlamentar i PS-së ka zgjedhur sot kryetarët e 5 komisioneve parlamentare. Ishte vet kreu i grupit parlamentar të PS-së, Taulant Balla ai që bëri publike këta emra. Ai pohoi se nënkryetare e Kuvendit për PS-në do jetë Vasilika Hysi.
“Asnjë deputet jashtë shtetit, kur ka seancë plenare. Me qëllim që të ulen edhe shpenzimet e qeverisë për vizitat e deputetëve jashtë shtetit”, tha mes të tjerash Balla.
Kryeministri Edi Rama deklaroi gjatë mbledhjes së Kryesisë dhe Grupit Parlamentar të Partisë Socialiste se Gramoz Ruçi i ktheu dinjitetin Kuvendit të Shqipërisë.
“Dua të falenderoj në mënyrë të veçantë Gramoz Ruçin, i cili realisht i ktheu dinjitetin sallës së Kuvendit dhe ktheu shpresën se në atë sallë mund të ketë sens dhe rregull, ku mund të flitet për njerëzit dhe jo vetëm për njëri-tjetrin. Dua të nënvizoj edhe një detaj të rëndësishëm: fillimi për herë të parë i seancave në orën fiks të përcaktuar është një normë që ne do ta respektojmë për 4 vite”, deklaroi Rama.
Kryeministri shtoi më tej: “Ne do të shkojmë në sallë për t’ia kushtuar të gjitha minutat njerëzve të zakonshëm, për të respektuar rendin e ditës dhe për të mbajtur të shtrirë dorën ndaj opozitës, pavarësisht nga refuzimi i tyre”.
Në mbledhjen e Kryesisë dhe Grupit Parlamentar të Partisë Socialiste u vendos që Ulsi Manja do të jetë kryetar i Komisionit të Ligjeve, Erion Braçe kryetar i Komisionit të Ekonomisë, Ermonela Felaj kryetare e Komisionit të Sigurisë, Mimi Kodheli kryetare e Komisionit të Politikës së Jashtme dhe Eduard Shalsi kryetar i Veprimtarisë Prodhuese.
Ndërkohë, Milva Ekonomi do të jetë nënkryetare e Komisionit të Arsimit, Elisa Spiropali do të jetë nënkryetare e Komisionit të Shëndetësisë dhe Blendi Çuçi, nënkryetar i Komisionit të Integrimit.
a.ç
