Krerët e koalicionit të majtë kanë zhvilluar një takim informal për të diskutuar mbi situatën politike në vend,për reformën e drejtësisë, procesin e dekriminalizimit si dhe strategjitë e ardhshme politke që do të ndiqen.
Kryeministri Edi Rama dhe Kreu i Kuvendit Ilir Meta ishin dhe të parët që iu drejtuan takimit, i cili më pas u shtua me prezencën e Kreut të grupit parlamentar të PS Gramoz Ruçi, atij të LSI Petrit Vasili, kryesuesit të reformës në drejtësi, Fatmir Xhafajt dhe po ashtu edhe Ministrit të Drejtësisë Nasip Naço.
I pari që la takimin ishte Ilir Meta. Ai tha se në fokus të bisedave ishte reforma në drejtësi në kushtet kur ditën e shtunë do të prezantohet dhe drafti i ekspertëve në Komisionin e Venecias.
Gazetarët e pyetën Metën nëse i qëndron deklaratës së dhënë më herët se ka nevojë për “impulse të reja” në kabinetin qeveritar dhe përgjigjja ishte: Impulset duhen në çdo moment. I pyetur për letrën e Kontrollit të Lartë të Shtetit që i kërkon Kuvendit ngritjen e një komisioni ekspertësh për hetimin e çështjes ”CEZ”, Meta tha se ende nuk e ka marrë një letër të tillë.
Në daljen e tij nga takimi, kreu i grupit parlamentar të PS, Gramoz Ruçi tha se në takim u fol për mundësinë që brenda javës të miratohet ligji për dekriminalizimin. Disa ditë më parë kreu i komisionit të posaçëm për Dekriminalizimin, Oerd Bylykbashi tha se ishte gjetur konsensusi me qeverinë për shenjat e gishtërinjve si kusht për këdo që është apo do t’i futet politikës. Bërja e testit të drogës është një tjetër kërkesë e opozitës për të cilën Ruçi tha se janë duke vijuar bisedimet për të dalë me një draft të përbashkët.
