Kryeministri Rama u shpreh sot në konferencën e përbashkët për shtyp me Kryeministrin e Kosovës, Isa Mustafa pas mbledhjes së dy qeverive, se, “Ajo që patë sot është kurorëzimi i një pune të gjatë përgatitore, jo thjesht për të bashkërenduar dokumenta e marrëveshje, por për të çuar përpara një plan strategjik integrimi të hapësirës sonë të përbashkët të ndërveprimit ekonomik dhe kulturor, sepse ai politik është ndërveprim që nuk ka munguar asnjeherë”.
“Me anë të këtyre marrëveshjeve”, tha Rama, “thellohet raporti në fushën e financave, tregëtisë, transportit, por edhe në përballjen e fatkeqësive natyrore. Unifikimi i plotë i tregëtise të vendeve tona dhe konsolidimi i përbashkët i tregut energjitik janë korniza e këtij angazhimi”.
Duke folur për dialogun mes Kosovës dhe Serbisë, Kryeministri Rama tha se, “sikur në 3 vjet mos të kishte cështje të hapura mes Prishtinës dhe Beogradit do të ishim realitet ëngjellor jo në Ballkan. Çështje të hapura kemi edhe mes nesh, të brendshme, por gjithçka duhet parë në kontekst. Dialogu nuk mund të shkojë përpara si në vaj dhe nuk mund të përmbyllet në pak kohë. Ç’ka i takon Kosovës, përmban zhvillim, anëtarësimi në FIFA dhe UEFA, nënshkrimi i MSA-së, liberalizimi i vizave janë arritje. Unë e kam thënë që sa më shpejt Serbia të çlirohet nga makthi i Kosovës dh eta pranojë si realitet aq më mirë do të jetë për të”.
Kryeministri i Kosovës, Isa Mustafa, në fjalën e tij theksoi se “Kosova dhe Shqipëria kanë arritur nivele të larta të bashkëpunimit përtej bashkëpunimit biletaral, Shqipëria është promotore dhe po jep përkrahje të paçmuar për anëtarësimin e Kosovës në organizata ndërkombëtare dhe vendet tona po avancojnë në axhendën e tyre evropiane”.
“Jam mirënjohës për mbështetjen e Shqipërisë dhe për angazhimin e përbashkët të ministrive tona në këto marrëveshje, të cilat ne i konsiderojmë të rëndësishme për thellimin e marrëdhënieve mes dy vendeve tona”, tha Mustafa.
“Ne duhet ta bëjmë më të lehtë shkëmbimin ekonomik dhe tregtar mes dy vendeve dhe tërheqjen e investimeve të huaja,pasi jemi vende të vogla dhe nevojitet një treg më serioz, i cili do të jetë tërheqës për investitorët e jashtëm”, nënvizoi Mustafa.
Kryeministri Mustafa u shpreh se “Kosova është trajtuar si rast i veçantë. Proceset e pazgjidhura me Serbinë do t’i zgjidhim përmes dialogut”.
“Çështjet që janë me Serbinë ne do t’i zgjidhim, por ato çështje do t’i shikojmë me ‘syzet’ e Kosovës dhe jo të Serbisë”, tha Mustafa.
Kreu i qeverisë kosovare duke folur edhe për anëtarësimin e Kosovës në NATO, tha se “ne patëm përkrahje edhe në Asamblenë e NATO-s në Tiranë, është një proces për të cilin ne jemi shumë të interesuar ta kapërcejmë, për këtë proces na na nevojiten përkrahës dhe vende që e vlerësojnë rolin që ne do ta fitojmë në NATO dhe rëndësinë e prezencës së NATO-s edhe në Shqipëri dhe në Kosovë dhe thellimin e bashkëpunimit tonë me NATO-n”. (javanews / r.a)
