Sinjali i RTSH për transmetimin e seancave të parlamentit nga mediat e tjera u bllokua për disa minuta, duke shkaktuar irritim në media, por edhe tek opozita. Televizioni Publik Shqiptar u tërheq nga vendimi për dhënien e sinjalit nga Kuvendi me pagesë për televizionet e tjera.
Por, pas rikthimit të sinjalit, ka reaguar edhe kryeministri Rama. Shefi i qeverisë deklaroi se TVSH- s’mund të ketë ekskluzivitet dhe se Kuvendi të ketë televizionin e vet. Jemi në kushtet e një shërbimi komunist në kushtet e demokracisë, deklaroi Rama.
Rama deklaroi se nuk është nevoja për 25 kamera në sallën e Kuvendit, por mjafton një regji televizive që ua jep aksesin të gjithë atyre që kanë dëshirë të transmetojnë të plotë apo të pjesshme çdo veprimtari të tij.
“Opozita u mbyt me një lugë ujë. Shërbimi i parlamentit për dhënien e hapësirës televizive duhet të ndryshojë. Jemi në kushtet e një shërbimi komunist në kushtet e demokracisë. TVSH nuk mund të ketë asnjë ekskluzivitet mbi hapësirën e jetës parlamentare. Kuvendi duhet të ketë televizonin e vet dhe shërbimin e vet, për të gjithë të interesuarit që e duan këtë shërbim. Në vendet demokratike ky sherbim jepet nga ekrani i kuvendit, dhe ka ardhur koha që të bëhet edhe në Shqipëri. Nuk mund të ketë disa kamera, mjafton një regji televizive e kuvendit dhe kjo do të shpërndajë sinjalin. Kërkesa e TVSH për t’ua shitur tv private sinjalin, i takon të shkuarës. Askush nuk mund ta ketë këtë ekskluzivitet. TVSH nuk mund t’iu imponojë logon konkurentëve të tij”.
Sali Berisha dhe Petrit Vasili bënë përgjegjës kryeministrin për këtë ndërprerje të sinjalit, duke e cilësuar atë një akt të rëndë ndaj fjalës së lirë.Kreu i qeverisë i quajti komedi akuzat e opozitës për censure.
“Për sa i përket censurës dhe mbylljes së gojës opozitës, është një komedi. Presim që opozita të dalë nga luga e ujit dhe të kthehet në sallë. Ne do merremi me punët e vendit, opozita le të merret me ne”
Reagimi i RTSH
Sakaq, drejtori i RTSH flet për newsbomb.al dhe thotë se televizionet janë njoftuar që një javë më parë përmes një shkrese zyrtare lidhur me këtë çështje.
“S’ka asnjë bllokim sinjali, u kemi kërkuar televizioneve private të lidhim kontratë e të ndajmë kostot teknike ose nëse e duan pa lekë, atëhere të transmetojnë pamjet me logon e RTSH Kuvend”, thotë drejtori i RTSH.
“Nëse e duan pa logo atëhere le të vijnë të lidhin kontratë, të ndajmë kostot e prodhimit e të kenë sinjal të pastër e të qartë”, thekson më tej Gëllçi.
/a.ç
