Për Kryeministrin Edi Rama, hapja e negociatave në dhjetor është një çështje e mbyllur. Kreu i qeverisë shqiptare, duke folur pas takimit me ministrat e Jashtëm të BE-së në Bruksel, theksoi se, i vetmi kusht për vendin tonë është zbatimi i ligjit të Vetting-ut.
“Shqipëria do t’i çelë negociatat, na duhet një periudhë përgatitore dhe për këtë ne e diskutuam, jo vetëm nga ana jonë, por edhe nga ana e Komisionit. Një proces vlerësimi, ndërkohë që patjetër na duhet të fillojmë dhe me zbatimin e ligjit të vettingut që le të themi është premisë e mirëkuptuar apo kushti i vetëm që ka Shqipëria. Nuk dëgjuam asgjë nga ato që iu propagandohen kot më kot, orë e çast, njerëzve në Shqipëri nga kazani i broçkullave që ziejnë çdo ditë”, tha Rama.
Kryeministri shtoi më tej se, “është shumë e qartë që jo vetëm Vettingu, por e gjithë paketa e implementimit të reformës në drejtësi është vetë procesi i negociatave”. Ai vuri në pah se, vende si Mali i Zi dhe Serbia që tashmë i kanë hapur negociatat, duhet të plotësojnë në kapitujt e drejtësisë disa prej gjërave që Shqipëria i ka plotësuar tashmë nga pikëpamja e legjislacionit.
“Sigurisht që implementimi është një proces disavjeçar që nuk është çështja: “Bëje sot që të marrësh diçka nesër”. Jam i bindur që negociatat kanë nisur, në kuptimin që Këshilli do të marrë rekomandimin pozitiv, do ta adoptojë dhe do të fillojmë përgatitjet. Në momentin kur përgatitjet do të jenë përfunduar nga ana jonë dhe nga ana e Komisionit – sepse dhe Komisioni ka një proces të përgatitjes, siç ka bërë me vende të tjera përpara nesh, – do të hapen kapitujt e negociatave. Pra, është një proces i pakthyeshëm dhe njëkohësisht që ka filluar”, përfundoi Rama.
Rama gjatë qëndrimit në Bruksel zhvilloi gjithashtu takime me Përfaqësuesen e Lartë të BE për Punët e Jashtme dhe Çështjet e Sigurisë Federica Mogherini dhe Komisionerin për Zgjerim, Johannes Hahn.
Ngae tij Komisioneri për Zgjerimin, Johannes Hahn duke folur për takimin është shprehur se Rama është zotuar për arritjen e rezultateve të mëtejshme në zbatimin e reformave të kërkuara nga BE.
