Në Ditën Ndërkombëtare të Vullnetarizmit, kryeministri Edi Rama ka folur për konceptin e bamirësisë dhe solidaritetit, duke sjellë në vëmendje strehimin e afganëve në Shqipëri pas tërheqjes së forcave amerikane dhe të NATO‑s nga Afganistani. Kryeministri e cilësoi atë si një provë të karakterit të vendit.
Sipas tij, ky veprim tregoi se pavarësisht madhësisë dhe pasurisë së kufizuar, Shqipëria nuk mund të kishte “një shpirt më të vogël” se vendet më të mëdha dhe më të pasura.
“Bamirësia nuk është një gjest, as një ngjarje, është disiplinë dhe ndaj të dyja jetojnë bashkë, edhe shpresa që pa bujarinë kthehet në abstraksion, ndërsa bamirësia pa shpresën kthehet në ofendim. Unë e kam përjetuar lidhur me mënyrën e qeverisjes dhe sesi shtete nuk ndërtohen vetëm me buxhete dhe politika, pikërisht në atë ngjarjen lidhur me afganët. Ishte një moment kur Amerika i la mbrapa duke tërhequr me vete gjithë NATO-n, të gjithë ata që i kishte nxjerrë nga errësira me premtimin se me ardhjen e Amerikës dhe NATO-s në Afganistan, çdo gjë do ndryshonte në jetën e tyre. aty kam parë Amerikën tjetër, kam kuptuar forcën e jashtëzakonshme të atij vendi kur njerëz nga më të ndryshmit u bënë bashkë dhe vinin telefonatat më të çuditshme që kërkonin ndihmë dhe e kërkonin këtu nga Shqipëria sepse ne u bëmë i vetmi vend që hapi dyert për afganët. Ne pamë pasqyrën ku reflektohej shpirti ynë dhe shpirti ynë, pavarësisht se jemi një ndër vendet më të vogla të NATO-s dhe më pak të pasura, nuk mund të ishte aq i vogël sa shpirti i atyre që mund të jenë më të pasur dhe më të mëdhenj se ne”, tha Rama.
Gjatë fjalës së tij, Rama theksoi se bamirësia shpesh keqkuptohet, duke u parë si një akt i thjeshtë dhurimi. Ai shtoi se bamirësia nuk është një gjest i rastësishëm, por një disiplinë që ecën paralelisht me shpresën.
“Bamirësia e vërtetë nuk është bujari me atë që ti ke të tepërt, por bujari në radhë të parë me vetveten, bujari që mishërohet te shprehja: Lum kush jep, jo kush merr. Bamirësia është një vendim për ta hapur veten ndaj tjetrit dhe për të mos e parë tjetrin si të huaj, si një barrë kur ai është në vështirësi, por si një pasqyrë ku reflektohet masa e njerzëllëkut që ke ti vetë”, u shpreh kryeministri.
