Kryeministri i vendit Edi Rama i është përgjigjur sërish akuzave të opozitës për abuzime me konçesionet. Sulmet e opozitës Rama i krahasoi me luftën që i’u shpall besimit fetar gjatë kohës së komunizmit kur u shkatërruan institucionet religjoze. Kreu i qeverisë tha se mazhoranca ka prioritet të forcojë bashkëpunimin me privatin.
“Ju e dini që jemi në një vend ku konçesionet po luftohen si me djallin, apo ashtu si u luftua për besimin fetar njëherë e një kohë kur nuk e lejuan kishat e xhamitë. Nuk jemi në atë lloj kohe shyqyr zotit. Më duhet të them që të kemi besim që të fuqizojmë partneritetin me sektorin privat. Jemi vend që nuk kemi rritur borxhin dhe nuk duam të rrisim taksat. Këtë vit do të finalizojmë kontrata të rëndësishme sa i përket naftës, sa i përket turizmit, por edhe fusha të tjera”, tha Rama.
Këtë deklaratë ai e dha gjatë një takimi me biznesmenë të huaj dhe vendas. Më tej Rama u ndal edhe tek objektivat e Shqipërisë për fuqizimin e ekonomisë dhe marrëveshjet ndërkombëtare për forcimin e shkëmbimeve tregtare. Ai theksoi si mjaft të rëndësishme shkëmbimin e të dhënave për transaksionet tregtare, për të shmangur evazionin.
“Biznesi është më shumë i mbrojtur seç ka qenë më përpara. Duke iu kthyer fazës së sistemit të çmimeve të referimit në doganë, mendoj se do të ishte më e përshtatshme 25 % më pak, por ne po bëjmë shumë me miqtë tanë italianë, dhe më në fund do të kemi shkëmbim të të dhënave.
Sepse mungesa e shkëmbimit të të dhënave në fakt po krijon një barrë të madhe dhe po hap hapësirë për evazion, dhe ndaj çmimet e referencës janë ende ekzistente. Në rast se do të ketë marrëveshje të mirë besoj se do të kemi sukses. Të gjitha mallrat që do të vijnë nga BE të mund ti kalojmë më cmimet e referencës, dhe pastaj do shohim si do veprojmë me mallrat që vijnë nga Kina etj”, tha kreu i mazhorancës Rama.
