Kryeministri Edi Rama ka bërë me dije se janë siguruar 50 mijë vaksina të tjera AstraZeneca, jashtë marrëveshjeve të deritanishme.
Rama e bën të ditur lajmin nëpërmjet një postimi më Facebook, ku shkruan se kjo sasi dozash është një marrëveshje e re, jashtë marrëveshjeve të derimëtanishme që janë lidhur me këtë kompani.
“Sapo kemi siguruar 50 mijë vaksina të tjera Astrazeneca jashtë marrëveshjeve të deritanishme”, thotë Rama.
Ndërkohë, më herët gjatë ditës së sotme, Ministrja e Shëndetësisë, Ogerta Manastirliu bëri me dije se gjatë muajit prill do të vijnë 20 mijë doza të vaksinës Pfizer, duke shtuar se vendi është i përgatitur për të rritur numrin e vaksinave.
Deri tani kanë mbërritur në Shqipëri 282,520 vaksina anti Covid. Prej katër ditësh tashmë, në vend vijon vaksinimi masiv, ndërsa në sheshin “Skënderbej” janë ngritur dy çadra ku po kryhet vaksinimi i të moshuarve mbi 75-vjeç, me vaksinën kineze “Sinonac”.
Autoritetet qeveritare kanë bërë me dije se objektivi është që brenda majit të jenë vaksinuar gjysmë milioni shqiptarë./ b.h
