Kryeministri Edi Rama ndodhet sot në Shkodër, ku së bashku me kreun e Kuvendit, Ilir Meta do të prezantojnë zyrtarisht kandidaten e maxhorancës për këtë bashki, Keti Bazhdarin.
Fillimisht kryeministri Rama është ndalur në stadiumin “Loro Boriçi” ku ka inauguruar nisjen e punimeve.
E pranishme ka qenë edhe ministrja e Arsimit dhe Sportit, Lindita Nikolla si dhe Presidenti i FSHF Armando Duka.
Në fjalën e tij, Kryeministri Rama deklaroi se qeveria ka bërë hapa përpara për rilindjen e sportit, ndërsa shtoi se me këtë investim, Shkodra do të ketë shumë përfitime.
Shefi i qeverisë theksoi se punimet do të mbarojnë në kohë, në mënyrë që ndesha e kthimit me Serbinë të luhet në shtëpinë tjetër të kombëtares kuqezi.
“Hapa përpara për rilindjen e sportit. Qeveria jonë shumë e vendosur të bëjë për sportin aq sa nuk është bërë në 20 vite të marra së bashku. I dhamë Elbasanit një stadium të standardeve ndërkombëtare. Ëndërroj që në këtë stadium shkodranët të vijnë me familjen. E bukura është mjeti efikas edhe kundër dhunës. Nga ana tjetër stadiumet janë ekonomi direkte dhe indirekte. Ne jemi të bindur që ky stadium do ti sjellë Shkodrës shumë më shumë. Boll të pyesni se sa të ardhura ka pasur Elbasani si qytet nga dy ndeshje të kombëtares. Jam i lumtur që arritëm të bindnim një nga arkitektët më inovativë, arkitekt australian që jeton në Gjermani, që të drejtonte projektin. Jemi të bindur se do të sjellë për Shkodrën një vepër arkitektonike. Objektivi është ta realizojmë në kohë. Koha është e shkurtër dhe unë dua që të punojmë fort. Në stadium do të jetë edhe muzeu i Vllaznisë për ta që sot se dinë kush është Loro Boriçi e pyesin në Facebook për këtë. Futbolli shqiptar e ka origjinën në Shkodër. Atë që nuk bëmë dot si shtet në 20 vite për sportin do ta bëjmë së bashku me realizimin e këtyre projekteve. Në respekt të atyre që i kanë dhënë emrin që ka Vllaznisë duhet ti rikthejmë emrin.” tha Rama
Redaksia Online
(JavaNews.al)
