“Shqipëria do t’i japë Maqedonisë mundësinë për një port në Durrës, të cilin do ta shfrytëzojnë kompanitë maqedonase për shkëmbim tregtar, ndërsa në të do të valëvitet edhe flamuri i Maqedonisë”, ky është premtimi që kryeministri shqiptar i ka bërë homologut të tij maqedonas, sipas mediave në këtë vend.
Lajmi konfirmohet nga kryeministri i Maqedonisë Zoran Zaev, i cili citohet nga mediat maqedonase, këtë ia ka premtuar homologu, Edi Rama.
Deklarata e Zaev është bërë gjatë një aktiviteti të organizuar ditën e sotme në Odën Ekonomike të Maqedonisë. Para sipërmarrësve maqedonas Zaev foli edhe për përfitimet e Maqedonisë nga marrëveshja me Greqinë dhe integrimin euro-atlantik.
Kryeministri i Maqedonisë tha se pas atij në Durrës, ata synojnë që të hapin edhe një port në Bullgari.
“Ja për shembull, me kryeministrin e Shqipërisë kemi të garantuar se do të na japin një port në Durrës ku do të valëvitet flamuri maqedonas.
Kjo do të ndikojë në përmirësimin e kushteve dhe shërbimeve që portet ofrojnë për kompanitë e Maqedonisë.
Një tjetër çështje është që të lidhemi me Bullgarinë, përmes Detit të Zi dhe besoj se kjo do të ndikojë shumë në konkurrencën e çmimeve, ofrimin e kushteve më të mira për shfrytëzimin e porteve”, deklaroi Zaev.
Në aktivitetin e sotëm, Zaev tha se përfitues më të mëdhenj nga marrëveshja me Greqinë dhe ajo me Bullgarinë do të jenë sipërmarrësit dhe qytetarët.
