Kryeministri Edi Rama, përmes rubrikës “AMARCORD”, sjell në vëmendje dy foto të Marubit, që nxjerrin në pah temperamentin thellësisht njerëzor të një patrioti të madh shqiptar nga Gjakova, Hysni Currit.
“Mund të thuhet pa frikë se ky luftëtar, i etur për shkollim dhe edukim për të gjithë popullin, është babai shpirtëror i të gjithë shqiptarëve të Kosovës me orientim të qartë dhe të prerë europian. Më 1914, kur disa xhakajdurë dhe karanxhollë të pagdhendur u sulën ta rrënonin shtetin e sapolindur për një pjatë me thjerrëza, Hysni Curri u shqua si luftëtar i vendosur i qëndresës në krye të 400 trimave të tij”, shkruan Rama.
Në foton e parë Hysni Currin e shohim me një kostum të fisëm të punuar ndoshta në Gjakovë a Prizren dhe me dekoratën e kalorësit të Urdhërit të Shqiponjës së Zezë dhënë prej Princ Vidit. Në foton e dytë shfaqet i rrethuar nga një plejadë patriotësh gegë e toskë: Thanas Floqi, Hile Mosi, Kel Marubi, Muço Qulli./b.d
