Kryeministri Edi Rama u është përgjigjur kritikave të Partisë Demokratike lidhur me situatën në sektorin e energjisë duke iu kujtuar edhe një herë gjendjen në të cilën ata e lanë këtë sektor.
Nga foltorja e parlamentit, Kryeministri Rama gjatë diksutimit të projektligjit për “Sektorin e energjisë”, tha se demokratët i lanë vendit vetëm në energji një borxh prej 540 milionë dollarë. Dhe kjo sipas kryeministrit nga keq qeverisja dhe keq menaxhimi i këtij sektori nga ana e PD.
Është spektakolare të dëgjosh sesi përgjegjësit për gjendjen e trashëguar të sektorit, flasin sikur po vazhdojnë nga larg, ndërsa deri pak kohë më parë kanë patur në dorë të bëjnë gjërat që thonë sot. Jo vetëm që s’i kanë bërë por i kanë lënë në një rrokopujë të madhe. Sektorin e lanë me 540 mln dollarë borxhe nga vendimmarrjet e këqija. Me borxhe lanë edhe OST duke e bërë të pamundur përmbushjen e funksionit të saj. Linjën e interkonjeksionit me Kosovën e lanë plotësisht të bllokuar për arsye tërësisht të errëta. E latë OSHEE me 1 mld borxhe që tejkalonin disa herë kapitalin e kompanisë, po kështu e latë me 1.3 mln dollarë fatura të pambledhura, duke shënuar nivel historik humbjesh prej 48 %”, tha kryeministri Rama.
Rama u kujtoi demokratëve se vetëm në 18 muaj, reformat e ndërmarrar në energji e kanë bërë më të stabilizuar këtë sektor, duke ulur deri në 31% humbjet në rrjet.
“Po çfarë kemi bërë ne në 18 muaj. Kemi arritur të reduktojmë nivelin e humbjeve vjetore në një masë të konsiderueshme dhe sot jemi në një nivel 31%. Tani më duke pasur stabilitet në sektor kemi të drejtë të besojmë se do shkojmë nën 30%. Nivelin e arkëtimeve e kemi rritur me 100 milionë dollarë. Koha kur kontrata konçesionare shkruhej dhe harrohej në sirtar, për ta kthyer më pas në tregun e zi ka marrë fund.” tha Rama
Redaksia Online
(Javanews.al)
