Kryeministri, Edi Rama gjatë një tryezë të përbashkët me ambasadorin amerikan, Donald Lu në simpoziumin antikorrupsion, deklaroi se Gjykata Kushtetuese do të bëjë rezistencë edhe pas opinionit të Komisionit të Venecias që do të përcaktojë nëse vendimi i tyre është në konflikt interesi për Vetting-un.
“Dua shumë që kur Venecia të japë opinionin e saj për Vetting-un, nuk do të ndeshemi me rezistencën e Gjykatës Kushtetuese. Kam arsye që të dyshoj se Gjykata Kushtetuese nuk do të sillet ashtu siç duam pasi kemi një shenjë të sjelljes së Kushtetueses ndaj ligjit të pronave. Gjykata ka bërë ndryshime në ligjin e pronave që bie ndesh me opinionin e Venecias”, tha Rama.
Më tej Kryeministri tha se me zbatimin e reformës në drejtësi jo vetëm do të largohen prokurorë dhe gjyqtarët e korruptuar por edhe do të ndryshojë imazhi i atyre që nuk janë të korruptuar, raporton panorama.
“Politikanët e korruptuar i bëjnë të pa korruptuarit të duken njëlloj, e njëjta gjë vlen për prokurorët e gjyqtarët. Kjo është arsyeja pse Vetting-u është i rëndësishëm, jo vetëm për të pastruar të korruptuarit nga drejtësia por dhe për të dhënë një mesazh për gjyqtarët e prokurorët të pa korruptuar”, shtoi kreu i qeverisë.
Në kuadër të nismave të qeverisë kundër korrupsionit, Rama bëri të ditur se po ndërtohet një sistem pilot, që do të nis me hipotekat.
“Po ndërtohet një sistem pilot, që do të nis me hipotekat. Qytetarët do drejtohen në një qendre të vetme ku do të marrin shumë shërbime, dhe kjo zyrë do t’u drejtohet zyrave të tjera. Nuk është qytetari që do të shkoj nga zyra në zyrë. Përmes reformave dhe modernizimit ne do të ulim korrupsionet në marrëdhënien e njeriut me shtetin” , tha Rama./a.k
