Nga Artur Ajazi
Ecejaket përmes rrjeteve sociale, mes Edi Ramës dhe Lul Bashës, pa e kuptuar fare kanë futur në kurth gjithë kampin opozitar. Romuzet, batutat, shakatë “pa dhe me kripë” nga ana e kryeministrit për gjumashin Basha, si dhe videot e papara të tij me “bufin e kënetës”, kanë çorientuar fare pikënisjen e fushatës së opozitës. Në PD, po mendojnë dhe aludojnë gjithëfarsoj skenarësh, duke hamendësuar për një zgjatim të marrëveshjes së 2017 mes Ramës dhe Bashës.
Disa të tjerë po i pësh-pëshin në vesh Doktorit se “Rama do ti japë Lulit më shumë deputetë në 11 Maj për të na sfiduar ne, ndaj dhe kanë nisur lojën e tyre në fb”. Gallata vazhdon me “lajmet dhe sekretet” që i çon Doktorit çdo ditë Belindi, duke i thënë se “ata po na tallin, e kanë skenar të përbashkët, por dhe ne do ti sjellim vërdallë me fitoren tone, ne do të fitojmë, populli na do”. Gjithë kjo kodemi e stisur nga kryeministri dhe që po telendis Lulin, padyshim ka sjellë sikletosjen dhe nervozizmin e Berishës.
Ai nuk po ndjehet fare i qetë, as në konferencat e shtypit, madje kur e pyesin gazetarët mbi “videot Rama-Basha”, prishet në fytyrë dhe justifikohet me togfjalëshin “ata po vazhdojnë marrëvshjen e tyre të 2017, unë nuk kam punë me ata”. Por ja që qetësia në kampin opozitar është prishur. Edi Rama nuk po merret pothuajse fare me Sali Berishën. Realisht atij nuk i intereson fare, po fare Doktori trumpist. Madje atij nuk i intereson fare as amerikani në “oborrin elektoral të Doktorit”, që medemek na paskësh ardhur për “të ndihmuar Berishën të marrë pushtetin”. Pallavra të tilla i dëgjuam 1 muaj më pare, kur LACivita, zbriti i hutuar në Rinas, vuri kushtet financiare ndaj Doktorit dhe lexoi edhe deklaratën e tij mbi “fitoren e PD në 11 maj”.
Edhe pse ishte i elektrizuar nga marrja e vulës partisë, dhe kujtoi se “kaq e pat Rama”, duke u mbushur mëndjen përkohosisht të vetëve se “me mua tani drejt pushtetit”, duket se entuziazmi i Doktorit ka rënë ndjeshëm. Kjo për faktin sepse atij i është prishur plani, qetësia, duke pare se fushata po bëhet më interesante mes Ramës dhe Bashës, dhe jo mes tij dhe kryeministrit. Realisht betejën Doktori e ka me Lulin, pasi partia e tij dhe e Lulit, janë “mishmashi” i kësaj beteje.
Me Edi Ramën, nuk ka dhe nuk mund të ketë betejë elektorale Sali Berisha. Të ndeshesh në një fushatë elektorale me dikë, që e konsideron kundërshtar politik, do të thotë të prezantohesh me arritje, programe, ide dhe staf solid. Gjë të cilën Doktori ka treguar qysh me “primaret” e famshme të tij, që nuk i ka. Atëhere, për “ç’fitorje” flet Doktori, kur fushata deri sot ka nisur dhe ka rrezik të bitiset, deri në fund mes Edi Ramës dhe Lul Bashës, duke e harruar fare Doktorin.
Ndoshta duhet të besojmë në profecinë e kryeministrit se “në 11 Maj , PD merr më pak deputetë se mori në 1997” ? Ndoshta duhet ti besojmë këtij parashikimi, duke ditur situatën e rënduar psikomorale që mbizotëron në zyrën e Doktorit dhe selinë e PD.
