Kryeministri Edi Rama krahas prezantimit të 61 kandidatëve të mazhorancës për bashki në zgjedhjet vendore, ka përfituar nga rasti që të japë sinjalin se në Aleancën për Shqipërinë Evropiane ekziston një koalicion i fortë.
Kjo pasi fjalën e tij në Pallatin e Kongreseve, Rama e nisi duke falenderuar aletatët e tij në qeveri, mes të cilëve kreun e LSI Ilir Meta, kreun e PDIU Shpëtim Idrizi, atë të FRD Bamir Topi, kreun e PSD Paskal Milo, liderin e PDK-së Nard Ndoka dhe kreun e PSV91 Petro Koçi.
Jo vetëm kaq, por shefi i qeverisë ka zgjedhur që fjalën përmbyllëse të këtij aktiviteti të ua lërë dy aleatëve më të rinj me të cilët arriti marrëveshje përpara zgjedhjes së kandidatëve, konkretisht Topi dhe Idrizi.
Edhe këta të fundit, në fjalën e tyre vlerësuan koalicionin mazhoritar, ndërsa theksuan se fitorja do të jetë e sigurtë.
