Nga Fieri, ku mori pjesë në shpërndarjen e pensioneve sipas skemës së re që ka nisur të aplikohet nga janari i këtij viti, kryeministri Edi Rama ka vlerësuar si të pazëvendësueshëm ministrin Erion Veliaj në kabinetin e tij qeveritar. Rama vuri në dukje se reforma e bërë nga ministri Veliaj sa i përket pensioneve ka dhënë rezultate të paimagjinueshme disa muaj më parë.
“Besoj se nuk është e vështirë që ta kuptoni të gjithë se unë jam i vetmi njeri që në gjithë këtë grup entuziast duartrokas me vështirësi pas fjalëve të Erionit sepse e di mirë vlerën e shtuar që ai ka sjellë në qeverisjen tonë. E di mirë çfarë reforme historike dhe themelore për shoqërinë dhe për vendin tonë është kjo e pensioneve, që ai e ka udhëhequr dhe e ka jetësuar në një sukses që vetëm 18 muaj më parë ishte e paimagjinueshme. S’do jetë e lehtë për ta zëvendësuar dhe për të bërë të mundur që zëvendësuesi apo zëvendësuesja të çojë përpara këtë punë të filluar me një vizion të qartë, të ndërtuar me vullnet të hekurt dhe të materializuar me rezultate që mund t’i vënë në dyshim e përqeshin vetëm ata që s’kanë jo vetëm dëshirën, por as edhe vullnetin më minimal që të informohen për jetën reale të njerëzve realë”, – tha Rama për Veliajn.
