Shumëkush me të drejtë, ndihet i paqartë në raport me çfarë po ndodh me reformën në drejtësi. Sigurisht që Partisë Demokratike i ka dalë boja dhe është e qartë se ata dhe vetëm ata janë pengesa për reformën që mbështetet nga 90% e shqiptarëve. Por në këtë klimë paqartësie kontribut të rëndësishëm ka edhe komuniteti ndërkombëtar dhe LSI. Të parët pasi ende mbeten të verbër dhe nuk e kuptojnë se Sali Berisha dhe Partia Demokratike nuk e voton kurrën e kurrës reformën në drejtësi.
Dhe për aq kohë sa ndërkombëtarët nuk e pranojnë këtë të vërtetë të hidhur, por përkundrazi vazhdojnë të ëndërrojnë një kompromis të momentit të fundit, Berisha dhe të tijët vazhdojnë të kenë oksigjenin e nevojshëm për të mbijetuar politikisht. Oksigjen që iu dha edhe sot nga vetë Ambasadori Lu, që duket sikur harron se pikerisht Partia Demokratike ka shkelmuar ofertën që Victoria Nuland bëri në emër të SHBA. LSI, nga ana tjetër, tregohet e kujdesshme. Në deklaratat publike nuk lë hapësira keqinterpretimi, ama në komunikimet informale shprehet hapur kundër reformës, çka në një vend të vogël si Shqipëria mjafton për t’i hedhur benzinë zjarrit dhe për të krijuar frymën e paqartësisë dhe destabilitetit.
Por ç’duhet të bëjë në këtë pikë Kryeministri Rama? Është fakt se Edi Rama ka bërë gjithçka mundej për të arritur kompromisin dhe votuar reformën. Ka pranuar çdo lloj kompromisi që nuk cënonte thelbin e reformës. Ka qëndruar stoikisht indiferent ndaj çdo talljeje publike të Partisë Demokratike që për muaj e muaj me radhë ka nxjerrë pretekst pas preteksti, vetëm e vetëm që reforma të mos votohej. Ka pranuar çdo lloj formule të ofruar nga partnerët ndërkombëtare, me bindjen se jo vetëm SHBA dhe BE kanë më shumë ekspertizë se ne shqiptarët në fushën e drejtësisë, por edhe sepse në fund të fundit është Bashkimi Europian që do të vendosë nëse do të na pranojë në gjirin e familjes europiane ose jo, dhe kjo do të varet nga aftësia jonë për t’u përshtatur me ligjet dhe institucionet e bashkimit ku duam të bëhemi pjesë.
Por as Edi Rama, as Partia Socialiste, e fatkeqësisht as mazhoranca qeverisëse nuk i kanë votat e mjaftueshme për ta kaluar të vetëm reformën. Detyra e Edi Ramës tani është e thjeshtë: Ai duhet të çojë reformën për votim ditën e enjte në Parlament dhe të sigurohet se votat e Partisë Socialiste dhe aleatëve janë në bllok pro reformës. Gjithashtu, Kryeministrit i takon që t’i apelohet për herë të fundit, edhe njëherë, deputetëve në Parlamentin e Shqipërisë dhe qytetarëve të vendit duke shpjeguar rëndësinë historike që kjo reformë ka për të ardhmen tonë të përbashkët.
Më pas, gjithçka është një ushtrim demokracie. Nëse në Parlament do të gjenden 94 votat e nevojshme, e ardhmja e Shqipërisë dhe e çdo shqiptari do të ndryshojë për mirë. Në të kundërt, Edi Rama do të duhet t’i drejtohet shqiptarëve sërisht për t’i kërkuar votat e tyre, në zgjedhje të parakohshme apo në zgjedhjet e ardhshme të përgjithshme të vitit të ardhshëm, me një premtim të thjeshtë: Reformën në Drejtësi. Në emër të një koalicioni që nuk ka ngjyra partiake apo kufij ideologjikë, por që kërkon vetëm një gjë: Reformën në Drejtësi.
Shkrimi është marrë nga lexo.al
