Pas ministrit të brendshëm Saimir Tahiri, edhe kryeministri i vendit Edi Rama ka reaguar me kritika të ashpra në drejtim të gjyqtarit që pezulloi nga detyra drejtorin e policisë Haki Çako.
Në një postim në Facebook, Rama shkruan se Çako u pezullua nga një gjyqtar i korruptuar që ka liruar 7 persona të inkriminuar. Për më tepër sipas Ramës gjyqtari në fjalë u shkarkua për korrupsion por u rikthye në detyrë nga sistemi i kalbur dhe i korruptuar i drejtësisë.
Ja postimi i plotë i Ramës:
Kush është gjykatësi që vendosi pezullimin e Drejtorit të Përgjithshëm të Policisë? Një personazh aq thellë i zhytur në kënetën e sistemit të drejtësisë sa vetë Këshili i Lartë i Kënetës e ka shkarkuar për korrupsion dhe mospërmbushje të detyrës!
Ky killer me pagesë apo me flamur partie i drejtësisë ka liruar nga burgu të paktën 7 herë njerëz të dënuar për vepra të rënda penale; vrasje, përdhunime, grabitje me armë… Po si mundi të kthehet në detyrë ky lloj personazhi që me vendimet e tij kriminale arriti të vërë në pozitë të vështirë edhe vetë sistemin e korruptuar të drejtësisë?! Kujt i duhej rikthimi nga i ndëshkuar në gjykatës i këtij shkelësi profesionist të ligjit, që ka dhënë të paktën 7 prova se çekiçin e drejtësisë e përdor për t’i shtypur kokën drejtësisë?
Thjeshtësisht e hidhur është përgjigja: Ky derdimen pa din e as iman e rimori çekiçin në dorë sepse u duhej atyre që sot nuk e duan Reformën në Drejtësi, për të shtypur drejtësinë për hesap të interesave të tyre!
/a.m.
