Kryeministri Edi Rama, referuar Ben Blushit, tha se është e papëlqyeshme që një deputet t’i fishkëllejë partisë së tij, ashtu siç është e papëlqyeshme që t’i fishkëllejnë një deputeti. Bëhet fjalë për ngjarjen e Elbasanit, kur disa persona reaguan me fishkëllima, gjatë kohës që Blushi po mbante fjalën e tij. Këtë qëndrim, Rama e mbajti në emisionin “Opinion”.
“Nëse unë si deputet i Vlorës, nuk do kisha shkuar kurrë gjatë këtyre dy vjetëve me ata të cilët bëra fushatë, e do më kishin parë nga televizori duke i fishkëllyer partisë, do ishte e habitshme, po të mos më fishkëllenin. Fishkëllimat nuk janë absolutisht fund i botës, por ka një problem të madh, kur bëhet diskutim dhe arrihet deri në përkufizime skandaloze, “mostra gjenetike e Elbasanit”, shkruante një kolegu juaj për skenën e papëlqyeshme. Nuk flas në publik për Ben Blushin. Atë që kam me deputetët dhe njerëzit e familjes sime politike, ia them sy më sy. Statuti nuk është Kushtetutë, por një libër rregullash. Sot rezulton se është shkelur një rregull. Ne kemi shkruar një statut me një mal me rregulla, por nuk ishim përgatitur për tu përballur me këtë problem”, tha Kryeministri.
Po i prerë në qëndrimin e tij Rama u shpreh edhe për ndërtimin e Bulevardit të ri, i cili ka ngjallur protesta të shumta nga banorët e lagjes së “Stacionit të Trenit”, të cilët kundërshtojnë çmimin që iu është ofruar nga qeveria për shpronësimet. Kryeministri ka thënë se ai Bulevard paçka protestave do të ndërtohet dhe nuk do të ndalohet nga sjellja e dhunshme, sipas tij, e banorëve që u prishet shtëpia.
“Këto sjellje provokuese, këto histori, nuk do të merren parasysh, nuk shkojnë. Bulevardi do të ndërtohet. Gjithçka që duhet bërë do të bëhet. Nuk ka vepër publike që do ta ndalojnë sjellje të tilla. Njerëzit duhet të gjejnë rrugën për të diskutuar”, ka thënë Rama. Ndërkohë që gjatë intervistës, ai ka dhënë përgjigje edhe për një dokument sekretet të policisë së Tiranës, i cili tregonte se policia nuk kishte elementët bazë të zyrës, duke filluar që nga hard disqet.
“Është pak si turp që të flasësh për Policinë e Shtetit. Ka dhe më keq se kaq. E latë Policinë e Shtetit që hanin fara kungulli në udhëkryq dhe e përdornin kapelën për të hedhur farat”, tha Rama, teksa nuk bëri asnjë koment për gjestin e deputetit Kokëdhima ndaj deputetit Sali Berisha.