“Alvin po kthehet në shtëpi”. Kështu shkruan kryeministri Edi Rama duke dhënë detaje për operacionin e shpëtimit të 11-vjeçarit Alvin Berisha nga kampi Al Hol i luftëtarëve të ISIS.
Me një foto, ky vogëlushi shfaqet në një makinë me ministrin e Brendshëm Sandër Lleshaj, Rama thotë se aktualisht Alvini ndodhet në Beirut në ambasadën italiane, ku po pret të pajiset me dokumente, për të fluturuar për në Romë.
Po ashtu, Rama shkruan se ky ishte një operacion i rrezikshëm, ndërsa thekson se në këtë aksion u angazhua edhe kryeministri italian Conte.
Postimi i kryeministrit Rama
• Pas një jave në kufirin sirian, së bashku me një skuadër speciale të policisë sonë dhe në bashkëpunim të ngushtë me partnerët italianë, ministri ynë i brendshëm po përcjell në këtë moment Alvinin në ambasadën italiane në Beirut, prej ku vogëlushi shqiptar do të pajiset me dokumentat e nevojshme e do të fluturojë drejt babait në Romë
• Një falenderim i veçantë për kryeministrin Giuseppe Conte, i cili u angazhua personalisht në ndjekjen e operacionit për palën italiane
• Faleminderit edhe dy organizatave humanitare që u bënë pjesë jetike e këtij operacioni tejet kompleks e të rrezikshëm, pa harruar konsullin e nderit të Shqipërisë në Liban, që luajti një rol të pazëvendësueshëm
• Por për ne, përpjekja nuk mbyllet këtu, sepse fëmijë e gra nga Shqipëria vazhdojnë të jenë peng në kampin-burg prej ku arritëm të nxjerrim Alvinin… /e.s/
