Kryeministri Edi Rama ka paralajmëruar edhe një herë të gjithë abuzuesit me karburantin se nëse evidentohen shkelje do të përballen me ligjin. Duke folur gjatë lançimit të operacionit të tretë më të rëndësishëm në vend, atë kundër vjedhjes dhe mashtrimit në sektorin e hidrokarbureve Rama tha se ky operacion do t’i japë fund abuzimit me pasuritë e vendit dhe mashtrimit të qytetarëve për çmimin e naftës.
Shefi i qeverisë e krahasoi aksionin për cilësinë e naftës, të njëjtë me aksionin kundër vjedhjes së energjisë.
“Para pak se të vija këtu isha në Panairin e Punës dhe e mbylla fjalën time me një shprehje që dëshiroj të filloj këtë fjalë, një shprehje të Shën Franceskut, që thotë “bëj atë çka është e nevojshme që të bësh atë që është e mundur, dhe atëherë do të bësh edhe atë që është e pamundur”. Pra çfarë kemi bërë deri më sot, e çfarë do bëjmë më tej me nisjen e këtij operacioni kundër grabitësve të pasurisë kombëtare, dhe kundër mashtruesve të qytetarëve tanë. Këto operacione janë pjesë e planit tonë për të çuar më tutje një proces që pasoi natyrshëm ndaljen e hemorragjisë që ishte pjesa më e parë e mandatit tonë qeverisës. Ne e gjetëm vendin si një trup të shtrirë përtokë që pikonte gjak nga çdo organ vital. Nuk ka një sektor të jetës së vendit tonë ku mund të thuhet se 18 muaj në vend gjendja nuk ishte hemorragjike. Sektori i energjisë që është dhe zemra e ekonomisë së një vendi, ishte shëmbëlltyra me kuptim plotë e kësaj hemorragjie asfiksuese. Njësoj si bëmë për energjinë elektrike, ku fillimisht u angazhuam për të ndalur hemorragjinë dhe pastaj filluam operacionin që vazhdon e do të vazhdojë deri kur i gjithë organizmi të jetë gati për t’u vënë në lëvizje të plotë e në funksion të konsumatorit, po bëjmë edhe sot me naftën”, tha kryeministri Rama.
Rama nënvizoi se pjesë e këtij aksioni do jetë dhe Policia e Shtetit, si në rastin e sektorit të energjisë.
“Policia e shtetit do jetë pjesë e këtij operacioni, siç ishte me energjinë, për të garantuar deri në fund se kush kapet në shkelje të ligjit dhe grabitje e mashtrim në kurriz të konsumatorit, të ndëshkohet. Ajo çka rezulton nga deklaratat e importit, përpara se të dal në shitje të jetë e njëjtë dhe të shënjohet. Shumë herë futet hollues, ose ku di unë ça fusin shqiptare, kur duan t’ja fusin tjetrit. Një Mercedez shkatërrohet brenda 3 viteve, ashtu si dhe mushkëritë e shqiptarëve.”, përfundoi kryeministri Rama.
Tahiri: Lufta e qeverisë, ta bëjë Shqipërinë më të jetueshme
Nga ana e tij edhe ministri i Brendshëm Saimir Tahiri premtoi angazhimin serioz të Policisë së Shtetit në këtë operacion të tretë të qeverisë, që siç tha ai, do ketë suksesin e dy të tjerëve. Tahiri tha se lufta e qeverisë sot është ta bëjë Shqipërinë më të jetueshme.
“Sot është dita për të kuptuar sa shumë kemi bërë dhe sa shumë duhet për të garantuar dinjitetin njerëzor, për ti dhënë dinjitet dhe mirëqenie çdo qytetari. Ne besojmë sot se duhet të kthejmë dinjitetin nëpërmjet punës dhe mirëqenies. Sot koordinojmë forcat mes shumë institucione për të shëruar një plagë shumëvjeçare siç është vjedhja e pasurisë kombëtare për të mos patur ngjarje si në Marinzë, që po hetohet, duke e bërë tregun e naftës monopol deri tek cilësia e karburantit që nuk prish vetëm makina dhe shkatërron shëndetin e çdo qytetari duke dërrmuar mjedisin. Lufta jonë ta bëjmë Shqipërinë më të pastër dhe më të jetueshme”. u shpreh Tahiri
Redaksia Online
(JavaNews.al)
