Është çeluar në kryeqytet panairi “Unë zgjedh arsimin profesional”. I pranishëm në aktivitet, Kryeministri Edi Rama tha se ata që mbarojnë arsimin profesional kanë dyfish mundësi punësimi krahasuar me ata që kan përfunduar arsimin e lartë. Rama ka shtuar se nëse arsimi profesional nuk do të ishte lënë pas dore nga qeveritë e shkuara, atëherë papunësia në rangun e të rinjve do të ishte më e ulët. Kryeministri theksoi se sot, gjysma e punëkërkuesve të regjistruar janë pa profesion.
“Para disa kohësh kur ne filluam detyrën zhvilluam një anketim me një shënjestër të përcaktuar për të kuptuar se çfarë shikonin investitorët në Shqipëri, si pengesat e tyre kryesore dhe për surprizën e shumë kujt, pengesën e parë për zhvillimin e mëtejshëm dhe për zgjerimin e investimeve të tyre, ata shikonin mungesën e krahut të kualifikuar të punës. Pastaj vinin me radhë gjykata, titujt e pronësisë dhe një pjesë fare e vogël shënonin edhe barrën e taksave.
Ishte momenti kur ne nisëm edhe me më shumë bindje atë që kishin përcaktuar në programin tonë, reformën në sistemin tonë arsimor. Trashëgimia mbetet e rëndë, pasi arsimi profesional u braktis. Shkolla profesionale të degraduara pas asnjë bazë materiale. reforma në arsim nisi me një ndarje mes arsimit të përgjithshëm dhe atij profesional.
Sot problemi do të ishte më i zbutur nëse do të ishte investuar në arsimin profesional.
Sot 55 për qind, më shumë se gjysma e punëkërkuesve të regjistruar nuk kanë asnjë profesion, ose janë me arsim vetëm 9-vjeçar”, tha Rama.
