Ministri i Brendshëm Sandër Lleshaj dhe drejtori i Përgjithshëm i Policisë së Shtetit Ardi Veliuishin ditën e sotme në familjen ish-efektivit të policisë Kolë Ndreshaj, i vrarë në krye të detyrës në vitin 2010.
Lleshaj tha se shtëpia e familjes së Ndreshajt do të rindërtohet nga fillimi me kontributin e gjithë punonjësve të Policisë së Shtetit. Ndërsa për dosjen e tij, Lleshaj tha se është një ngjarje delikate për t’u zbardhur ndërsa shtoi se Reforma në Drejtësi do të bëjë të mundur zbardhje të ngjarjeve të tilla kriminale.
“I ndjeri Kolë Ndreshaj ka rënë në detyrë. Kam pasur fatin e mirë dhe të keq që të takohem me të gjithë familjarët e policëve të rënë në krye të detyrës. Policia e Shtetit kanë marrë masa dhe janë përpjekur për t’i mbështetur dhe ndihmuar. Pashë që familja Ndreshaj jeton në kushte të rënda dhe muret bien sa t’i prekesh me dorë. Kemi krijuar një fondacion që të mobilizojmë fonde dhe t’i bëjmë thirrje bizneseve që të japë një dorë që kjo situatë të përmirësohet. Do vazhdojmë me rindërtimin e shtëpisë të familjes Ndreshaj. Punonjësit e Policisë së Shtetit kanë dhënë kontributin e tyre.
Kemi ndenjë detyrimi ndaj policëve të rënë në detyrë. Unë i kam parë nga afër shumë nga familjet e tyre. Është një apel për shoqërinë që të reflektojmë sepse kemi shumë policë të vrarë. Ka shumë për të bërë. Duhet të gjejmë një mënyrë edhe për të sensibilizuar shoqërinë
Ngjarje të tilla janë gjithmonë delikate për t’u zbardhur. Disa dosja nuk quhen asnjëherë të vjetra. Reforma në Drejtësi do të bëjë të mundur zbardhjen e ngjarjeve kriminale”, tha Lleshaj.
Kolë Ndreshaj u vra në 29 gusht të vitit 2010 teksa ishte në detyrë në Malësinë e Madhe. Ndreshaj, 41 vjeç, ishte punonjës i policisë së Njësisë Rajonale të Qarkullimit Rrugor Shkodër. Viktima e veshur me uniformën dhe me motor, po kthehej nga shërbimi, kur është zënë pritë nga persona të paidentifikuar, 300 metra larg aksit kombëtar Shkodër-Koplik.
g.kosovari
