Qendra e Shërbimeve Arsimore ka sqaruar maturantët që kanë ngritur shqetësim në lidhje me pikëzimin e testit për lëndët e arsimit profesional dhe lëndët e seksionit dygjuhësh shqip-italisht, Histori Italiane dhe Fizikë Italiane.
Sipas njoftimit të QSA, lëndët e provimeve me zgjedhje të seksionit dygjuhësh shqip-italisht (Histori Italiane dhe Fizikë Italiane), të cilat janë hartuar dhe vlerësuar nga Ambasada Italiane, i përkasin shkollave të arsimit të mesëm të lartë dhe kanë patur në total 50 pikë. Testi përmbante vetëm pyetje me zhvillim.
‘Duke qenë se në “Maturën Shtetërore 2019” përdoret vetëm një shkallëzim pikë-notë, atëherë testet e seksionit dygjuhësh janë konvertuar në totalin prej 60 pikësh. Këto lloj testesh nuk kanë patur pyetje me alternativa dhe për këtë arsye, kolona me alternativa del “zero”. Kolona totale përfshin pikët e konvertuara në 60 pikë.
Lëndët e arsimit profesional kanë patur në total 40 pikë, nga të cilat 10 pikë ishin pyetje me alternativa dhe 30 pikë, pyetje me zhvillim. Duke qenë se në “Maturën Shtetërore 2019” përdoret vetëm një shkallëzim pikë-notë, atëherë këto lloj testesh janë konvertuar në totalin prej 60 pikësh. Kolona totale përfshin pikët totale të konvertuara në 60 pikë.
I njëjti arsyetim vlen edhe për testin e gjuhës shqipe-letërsi dhe matematikës, për kurrikulën e vjetër, të cilat kanë patur një total prej 50 pikësh’, sqaron Qendra e Shërbimeve Arsimore./l.m
