Qindra qytetarë i janë bashkuar sot protestës para Gjykatës Administrative të Apelit të thirrur nga kryetari i Bashkisë së Tiranës, Erion Veliaj kundër ndërtimit të pallatit 17 katësh të Diga e Liqenit. Pjesë e kësaj proteste u bënë edhe përfaqësues të shoqërisë civile si dhe deputetë të PS të qarkut Tiranë, anëtarë të Këshillit Bashkiak si dhe kryebashkiaku Veliaj.
Me pankarta në duar ata kanë kërkuar drejtësi nga ana e Gjykatës, duke ndryshuar së pari trupën gjykuese e cila sipas Bashkisë së Tiranës është në konflikt të pastër interesi dhe së dyti për një gjykim të drejtë dhe të papanshëm të çështjes.
Në fjalën e tij gjatë kësaj proteste kryebashkiaku Veliaj u shpreh se leja e ndërtimit të pallatit 17 është në kundërshtim me raportin e Bordit të Digave i cili e konsideron atë zonë me rrezikshmëri. “Sot jemi këtu përpara kësaj gjykate dhe këmbëngul ta them se ky nuk është kërcënim, por një premtim. Ne kemi bërë premtim publik në fushatë se ndërtimi te diga nuk do të lejohet dhe se do të respektojmë vendimin e Komitetit të Digave”, tha Veliaj.
Gjithashtu ai shtoi se ngatërrimi i projektit të këndit të lojërave me pallatin 17 katësh te diga është kriminale për vetë rrezikshmërinë që mbart për jetën dhe pronën e qytetarëve të Tiranës. “Secili prej nesh mund të ketë opinione të ndryshme për cilësinë e gjërave por të ngatërrosh me qëllim këndine e lojërave që është pëublik, është falas, është për fëmijët, me një ndërtim 220 mijë m2 me vlerë me vlerë fitimi 220 milionë euro në Digën e Liqenit të cilin Komiteti i Digave e ka shpallur të rrezikshëm si ndërtim, është me dashje të bëhesh pjesë e një aktiviteti kriminal. Kjo është diferenca mes dy projekteve”, – shtoi kryebashkiaku.
Ndaj ai ka theksuar se është e domosdoshme që së pari çështja të gjykohet nga një trup e paanëshme gjyqësore. “Si ka mundësi që, gjyqi i fundit i datës 2015 shqyrtohet i pari, e kalon rradhën, nuk ndodh kjo për një qytetar me rrogë modeste. Por, sigurisht që një bisnesmen që do të fitojë 220 milionë euro në kurriz të Tiranës kjo ndodh, nuk ndodh kjo për një pensionist, nuk ndodh kjo për një minator që do të verifikojë ditët e veta të punës, që ndoshta miniera e vet nuk ja ka mbajtur siç duhet e apelon Gjykata Administrative. Nuk ndodh kjo për një pensionist, nuk ndodh kjo për një ish-ushtarak, vendime të vogla amdinistrative për 1 minutë nuk ndodh. Për biznesin e madh kalohet radha. Pyetja lind, nëse këta prishin radhën dhe disa qytetarë janë më të barabartë se qytetarë e tjerë, çfarë garancie kemi ne kur këta japin drejtësi, këta shkelin edhe rregullat e gjykatës për të respektuar radhën e gjyqeve. Jo vetëm kaq, dje gjykata mori një vendim pa ftuar palët, mori një vendim pa pasur një njeri, u ul dhe shkrujti vendimin dhe tha, nuk e ndryshojmë trupin gjykyes”, – tha Veliaj. (javanews.al / a.r)
