Këshilli Kombëtar i Territorit, gjatë një mbledhje me dyer të mbyllura, i ka hapur rrugën disa investimeve, me vlerë 250 milionë euro. Pas mbledhjes, zëvendëskryeministri Niko Peleshi, në një deklaratë për shtyp, nuk dha detaje për subjektet dhe hartën e zonave zhvillimore, por tha se do të punësohen 2800 vetë, ndërsa vlera e investimeve do të jetë 250 milionë euro. “Ka pasur një interes të madh për këtë vendimmarrje, e cila i ka dhënë rrugë nga sot investimeve private në disa sektorë të rëndësishëm të ekonomisë, me një vlerë totale prej 250 milion Euro. Impakti në punësim do të jetë 2800 të punësuar të qëndrueshëm, në sektorë si; hidroenergjitika, energjitë e rinovueshme, sistemeve fotovoltaike të prodhimit te energjisë elektrike, turizmit etj.
Vetëm në një resorit të miratuar sot, vlera e investimit shkon në mbi 150 milionë euro”, u shpreh Peleshi. Zëvendëskryeministri shtoi se janë vendime të tjera për të rikonstruktuar, për të sjellë në normalitet dhe për të modernizuar, dy institucione të kulturës shumë të rëndësishme siç janë Teatri i Operës dhe Baletit dhe Biblioteka Kombëtare. “Natyrisht që ne besojmë se interesi i rritur i investimeve vjen mbas konsolidimit të kuadrit ligjor. Kemi miratuar kujtoj një ligj shumë pro biznes për investime strategjike, kemi miratuar ligjin e partneritetit publiko – privat, kemi miratuar ligjin e turizmit dhe aktet nënligjore në funksion të tij. Por ndërkohë kemi përmbyllur një proces që për më shumë se njëzet vjet nuk ka mundur dot të finalizohet, hartimi dhe miratimi i Planit të Zhvillimit Kombëtar. Një plan i munguar që i ka hapur tani rrugën, zbërthimit apo derivimit në Plane të Zhvillimit Rajonal dhe në Plane të Përgjithshme Vendore”, tha Peleshi.
Projektet, mister vendndodhja
Sipas burimeve nga Ministria e Zhvillimit Urban, projektet, për të cilat është dhënë leja e zhvillimit janë disa, megjithatë, ndonëse na është vënë në dispozicion lista e tyre, mbetet mister emri i kompanive zhvilluese, si dhe vendndodhja. Sa i takon sektorit energjetik, Shqiptarja.com ka mësuar se Këshilli Kombëtar i Territorit ka dhënë leje zhvillimore për tre HEC-e, ku investimi do të jetë 22 milionë euro, ndërsa do të hapen 220 vende të reja pune. Në fushën e turizmit është dhënë leje zhvillimit për një resort turistik me vlerë investimi 180.000.000 euro, ku pritet të hapen 1350 vende të reja pune. Janë dhënë gjithashtu leje për zhvillime sportive, argëtimi dhe turizëm me vlerë investimi 9 milionë euro, ndërsa pritet të hapen 350 vende të reja pune.
Energji e rinovueshme
Në sektorin e energjisë së rinovueshme, Këshilli Kombëtar i Territorit kanë dhënë leje për ndërtimin e tre Centraleve Elektrike Fotovoltaike me vlerë totale investimi 9.75 milionë euro, ku do të hapen 105 vende të reja pune. Në sektorin e kulturës janë miratuar dy projekte për rikonstruksionin e Teatrit të Operës dhe Baletit dhe Bibliotekëa Kombëtare, me vlerë totale investimi 14.888.926 euro. Në kuadër të zhvillimeve ekonomike dhe industriale, janë dhënë leje për tre projekte me vlerë totale investimi 13.600.000 euro, ku do të hapen 750 vende të reja pune.
shqiptarja.com
