Pas publikimit në media se Këshilli Kombëtar i Territorit (KKT) ka dhënë leje ndërtimi për një pallat 9 katësh në rrugën e Kavajës,për llogari të firmës së Mihal Delijorgjit, ka reaguar qeveria e cila ka sqaruar se bëhet fjalë për konfirmimin e një sërë këkesash për leje zhvillimore të bëra nga Bashkia e Tiranës nën drejtimin e Lulzim Bashës, ku përfshihet edhe firma e Delijorgjit, Parc Construction.
“Këshilli Kombëtar i Territorit ka shqyrtuar këto kërkesa të Bashkisë së Tiranës dhe ka konfirmuar, sipas ligjit nr. 107/2014, si edhe vendimit nr. 877 datë 03.10.2013 të Këshillit të Ministrave, ato leje ndërtimi që përputhen me instrumentet e planifikimit vendor.” -thuhet në reagim.
Reagimi i plotë në Transparenca.al
Në medien e shkruar dhe në disa portale online, është publikuar një artikull në të cilin pretendohet se më datë 9 shtator, Këshilli Kombëtar i Territorit (KKT) ka miratuar lejen e ndërtimit për ‘Godinë banimi dhe shërbimesh 9 kate mbi tokë 2 kate parkim nën tokë’, me vendndodhje në Rrugën e Kavajës, me subjekt kërkues “Parc Construction” sh.p.k..
Për dhënien e lejes së ndërtimit nga KKT:
Përkundër pretendimit të disa portaleve se KKT-ja ka dhënë disa leje ndërtimi, mes të cilave edhe për “Parc Construction” sh.p.k., vlen të saktësohet se lejet në fjalë janë vetëm konfirmime të një numri kërkesash për leje zhvillimi, të bëra nga Bashkia e Tiranës nën drejtimin e Lulzim Bashës. Këshilli Kombëtar i Territorit ka shqyrtuar këto kërkesa të Bashkisë së Tiranës dhe ka konfirmuar, sipas ligjit nr. 107/2014, si edhe vendimit nr. 877 datë 03.10.2013 të Këshillit të Ministrave, ato leje ndërtimi që përputhen me instrumentet e planifikimit vendor.
Miratimi i listës së parashtruar nga Bashkia e Tiranës është bërë duke marrë parasysh vetëm këtë përputhshmëri, pasi çdo kompetencë tjetër mbi këtë proçes është e pushtetit vendor. Ndërsa firma e Kryeministrit në këtë proces miratimi, është thjesht dhe vetëm shprehje e vendimmarrjes formale e KKT-së mbi kërkesat e Bashkisë së Tiranës.
