Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi nënshkroi të enjten kontratat me pesë përfaqësuesit e projekteve fituese që konkuruan për mbështetje financiare të projekteve në turizëm. Shuma e financimit të këtyre 5 projekteve fituese është 16.433.715 lek.
“Qeveria shqiptare mbetet e angazhuar fort në promovimin dhe mbështetjen e sipërmarrjes që operon në sektorin e turizmit”, theksoi Ekonomi, duke shtuar se projektet synojnë jo vetëm promovimin e turizmit, por edhe trajnimin e personave që punojnë në këtë sektor për të rritur cilësinë e shërbimit.
Në shërbim të këtij angazhimi në prill të 2016 qeveria miratoi vendimin “Për përcaktimin e kritereve e të afateve të kërkesë propozimeve për mbështetje financiare të projekteve në turizëm”.
Ekonomi ftoi të gjithë ata që kanë aftësi të kontribuojnë në turizëm të aplikojnë në thirrjet e ardhshme.
Të dhëna për projektet e shëpallura fituese:
1-) Projekti “Korridori Ali Pashe Tepelena”
Aplikanti :ART KONTAKT
Statusi Ligjor: OJF
Fondi i përfituar: 2,050,000 lek
Përmbajtja e projektit: Ka si qëllim të krijojë kushtet për krijimin e korridorit/itinerarit kulturor turistik të Ali Pashë Tepelenës, bazuar në rrjetin e kalave, urave dhe dhjetëra vendbanime objekte etj, të ndërtuara gjatë sundimit të Ali Pashës.
Projekti parashikon studimin e fizibilitetit të këtij turizmi tematik, krijimin e brand-it të Korridorit Ali Pashë Tepelena. Hartimin e një linje produktesh tipike lokale, shërbimesh turistike, hartimin e një plani komunikimi dhe promovimi Brenda dhe jashtë kufinjve.
2-) Projekti “Projekt ide për promovimin e Shqipërisë si destinacion turistik ne Itali”
Aplikanti: Elona Pinguli
Statusi Ligjor: Person Fizik
Fondi i përfituar: 2,489,112 lek
Përmbajtja e projektit: Promovimi i Shqipërisë si destinacion turistik në tregun italian dhe krijimi i një treg të strukturuar turistik mes Italisë dhe Shqipërisë. Promovimi i Shqipërisë në mënyrë profesionale para operatorëve turistik italian që kanë target turizmin Ballkanik. Promovimi i Shqipërisë si destinacion turistik që ofron shumë opurtuinitete me kosto të ulët dhe sadisfaksion të lartë për turistin Italian.
3-)Projekti “Platforma all in one booking online ‘Visit Albania Now’”
Aplikanti: Skikuli Dot Com
Statusi Ligjor: Person Fizik
Fondi i përfituar: 2.330.000 lek
Përmbajtja e projektit: “Visit Albania Now” është një website që i ofron turistëve të huaj, mundësinë e prenotimeve të shërbimeve të ofruara nga biznese shqiptare në fushën e turizmit. Nëpërmjet këtij website, vizitorët do të kenë mundësi që të rezervojnë/prenotojnë dhoma hotelesh/hostelesh,camping, makina dhe biçikleta me qira etj.
Në këtë mënyrë operatorët turistik kanë mundësinë që të rrisin të ardhurat e tyre.
4-) Projekti “Korça me biçikletë”
Aplikanti: Prefekti i Qarkut Korçë
Statusi Ligjor: P.J /Institucion Publik
Fondi i përfituar:1.962.302 lek
Përmbajtja e projektit: “Korça me biçiklete” ka si qëllim promovimin e turizmit në Bashkinë Korçë nëpërmjet pedalimit. Ky projekt synon nxitjen e turizmit nëpërmjet eksplorimit të natyrës të mrekullueshme të rajonit, vlerave të trashëgimisë kulturore si dhe nxitjen e grup moshave të ndryshme të përdorin biçikletën. Broshura pedaluese “Korça me biçikletë” do të përmbajë 19 itinerare me një total prej 864 kilometra në formën e një guide.
5-) Projekti “Rritja e konkurueshmërisë së turizmit rajonal nëpërmjet rritjes së kapaciteteve njerëzore të bizneseve turistike”
Aplikanti: BiznesAlbania
Statusi Ligjor: OJF
Fondi i përfituar: 7.602.300 lek
Përmbajtja e projektit: Është formimi intensiv i personelit të 10 hoteleve turistike dhe 10 restoranteve në Pogradec si dhe 15 hoteleve dhe 10 restoranteve në Durrës për shërbime cilësore turistike, që çojnë në përmirësimin e tipareve të produktit turistik ofruar dhe rritjen e konkurueshmërisë së ofertës turistike në këto rajone./a.k
