Një njoftim i ERU lë të kuptojë që qeveria po përgatitet të rrisë çmimin e ujit.
“Ndërmarrjet e Ujësjellës Kanalizimeve tashmë do të duhet të kalojnë në një fazë tjetër para aplikimit për tarifat e reja te Enti Rregullator të Ujit” – thuhet në njoftim.
Sipas njoftimit në fjalë “një udhëzim i Entit Rregullator të Ujit parashikon zhvillimin e seancave dëgjimore para aplikimit për tarifa të reja”.
Gazeta “Dita” ka hapur sot faqen e parë të saj duke theksuar se njoftimi nuk saktëson se çfarë nënkuptohet me termin “tarifa të reja”, por logjika ta do që nuk bëhet fjalë për ulje çmimi.
“Referuar udhëzimit, çdo operator duhet të zhvillojë seancë dëgjimore me publikun me qëllim informimin dhe diskutimin me konsumatorët lidhur me ndryshimin e tarifave, arsyet e këtyre ndryshimeve, planet për të ardhmen, si dhe marrjen e komenteve nga palët e interesuara lidhur me këtë propozim” – thuhet në njoftim sipas ‘Dita’-s.
UKT ka lënë të kuptohet se rrjeti ka nevojë për investime dhe kjo justifikon një rritje të çmimit për konsumatorët.
Përpjekja me gjasa do shkaktojë një tjetër debat politik në vend, ngjashëm me ndryshimin e tarifave të energjisë.
