Qeveria parashikon të kalojë në filtër të gjithë veprimtarin financiare të zhvilluar nga ish kryetarët e komunave në të gjithë Shqipërinë, për mënyrën sesi ata kanë përdorur paratë e dhëna nga buxheti i shtetit, si dhe nga taksat e grumbulluara. Për këtë qëllim, ditën e hënë, pritet të përzgjidhet edhe një kompani auditimi ndërkombëtarë.
Do të jetë pikërisht ky audit ai që do të evidentojë jo vetëm problematikën për mënyrën sesi janë përdorur fondet nga ish kryetarët e komunave, por të përcaktojë edhe për 61 bashkitë e dala pas zgjedhjeve vendore të 21 qershorit, për mënyrën sesi ato do të kontrollojnë dhe kosolidojnë financat e tyre. Kjo u bë e ditur gjatë një takimi që Ministri për Çështjet Vendore, Bledi Çuçi, zhvilloi me krerët e 61 bashkive të vendit.
Akuzat për shpërdorime si dhe abuzime të mëdha financiare nga ana e kryekomunarëve kanë qenë pjesë e një debati të gjerë publik dhe politik, ku nuk kanë munguar akuzat për korrupsion si nga politika ashtu edhe nga qytetarët. Reforma territoriale shkriu komunat në të gjithë vendin. Kryetarët e rinjë të bashkive prej kohësh kanë kërkuar që të bëhet auditi financiar për të gjitha ish- komunat me qëllim nxjerrjen në pah të problematikave të krijuara. Tashmë duket se qeveria po hedh një hap në këtë drejtim.
