Qeveria shqiptare anuloi një vendim të vitit 2012 për kolaudimin e automjeteve frigoriferike njohur si “Kontrolli i Brendshëm i mjeteve me ushqime delikate gjatë transportit ndërkombëtar” pas një këmbëngulje të “Qendrës së Eksporteve Shqiptare”. Alban Zusi president i “Qendrës së Eksporteve Shqiptare” përshëndeti këtë vendim të qeverisë duke theksuar se qeveria e dëgjoi dhe zgjidhi këtë shqetësim të bizneseve që prekeshin nga ai udhëzim abuziv.
Gjithçka nisi në muajin Gusht 2016 kur Inspektorët e Drejtorisë së Përgjithshme të Shërbimeve të Transportit Rrugor (DPSHTRR) ndalonin, kamionët duke i paralajmëruar se nga 1 shtatori 2016, zbatohet një procedurë e re kontrolli për automjetet me temperaturë të kontrolluar. Kontrolli iu dha në formën e koncesionit një kompanie private me një pikë të vetme kolaudimi për të gjithë Shqipërinë, nga ku kosto e procedurës ishte 40 000 – 60 000 LEKE.
Departamenti juridik i “Qendrës së Eksporteve Shqiptare” për zgjidhjen e këtij problemi në periudhën kohore Gusht 2016-Janar 2017 nisi një komunikim intensiv me Zyrën e Kryeministrit Rama, Ministrinë e Transporteve dhe atë të Ekonomisë.
Kabineti i Kryeministrit Edi Rama, u shpreh i gatshëm për ti dhënë zgjidhjen e duhur këtij shqetësimi ardhur nga biznesi. Ministria e Ekonomisë pasi u njoh me këtë shqetësim të paraqitur nga “Qendra e Eksporteve Shqiptare”, u shpreh se: “Kërkesa për certifikatat ATP për transportin e brendshëm tejkalon kërkesat ligjore”.
Gjithashtu Ministria e Ekonomisë konstatoi se: “Emërimi i një eksperti të vetëm në procesin e kolaudimit, lë hapësirë për abuzim. Kjo ministri ia adresoi çështjen drejtpërdrejt Ministrisë së Transportit për ndjekje të mëtejshme. Ministria e Transportit dhe Infrastrukturës angazhoi ZV Ministri Bahri Shaqiri për ndjekjen e këtij shqetësimi të komunitetit të biznesit. Argumentet e “Qendrës së Eksporteve Shqiptare” se ky udhëzim dëmton biznesin u pranuan.
Më 17 janar 2017 – përmes URDHËRIT Nr. 253 Ministri Sokol Dërvishaj, urdhëroi shfuqizimin e pikave 1.2b, 8, 17.1 dhe lidhja 2 Udhëzimit Nr. 7 Dt. 15.06.2012 “Për kontrollin e mjeteve të transportit në regjim të temperaturave të kontrolluara, sipas Marrëveshjeve ATP”.
