as gjashtë vjetësh kërkesë nga mjekët e Qendrës Kombëtare të Transfuzionit të Gjakut (QKTGJ) bëhet më në fund realitet kryerja e analizave të gjakut sipas teknikës NAT (anglisht,Nucleic Acid Amplification Technology), pikërisht në Ditën Botërore të Dhurimit Vullnetar të Gjakut. Kjo teknikë e re ka për qëllim kontrollimin e gjakut nga infeksione, si ato të Hepatitit B, C dhe HIV.
Ministri i Shëndetësisë Ilir Beqaj ndërsa ka dhuruar gjak u ka drejtuar të gjithë qytetarëve një apel, të kryejnë këtë akt human, të dhurojnë gjak në ndihmë të fëmijëve talasemikë, por edhe të çdo personi tjetër që ndodhet në kushte jo të shëndetshme. “14 Qershori është Dita Botërore e Dhurimit Vullnetar të Gjakut dhe unë do të shfrytëzoj këtë moment për të ribërë ftesën për të gjithë publikun që të dhurojnë gjak, duke u nisur nga ajo që çdo pikë gjaku që dhurojmë praktikisht vlen për të shpëtuar një jetë, dhe për të gjithë mund të vijë një moment që të kemi nevojë për gjak,” është shprehur Ministri Beqaj.
Nga ana tjetër, ai ka theksuar rëndësinë e kësaj metode të re të kryerjes së analizave të gjakut, e cila kishte vite që kërkohej nga mjekët e qendrës. “Unë kam gjetur në tavolinën e punës përpjekje të nisura edhe para se të bëhesha ministër, por më në fund jam i kënaqur që ne ia dolëm të kurorëzojmë sot fillimin e funksionimit të teknikës që duhet NAT për të zbuluar, siç e tha edhe doktoresha (Dr. Rinalda Skëndaj), në një periudhë shumë të shkurtër mundësinë e një infeksioni i cili praktikisht rezultojnë se janë të pranishme në qytetarë të ndryshëm apo në pacientë të ndryshëm,” ka pohuar kreu i shëndetësisë.
Këtë vit do të shpenzohen rreth 70 milion lekë për vënien në funksionim të sistemit që mundëson kryerjen e kësaj metode moderne analizash, ndërkohë që në vitet në vijim ky buxhet do të vijë në rritje.
Mjekët e QKTGJ kanë shpjeguar përparësitë dhe përfitimet nga vënia në funksionim e kësaj metodeje moderne testimi, duke renditur sigurinë e lartë të gjakut, periudhë më të shkurtër për të pritur rezultatet e analizave, dhe ajo që është më kryesorja, uljen e mundësisë së infektimit të personave që marrin gjakun e dhuruar. “Kjo është një teknologji që mundëson testimin e gjakut për agjentë infektivë siç është Hepatiti B, C dhe HIV.
Teknologjia NAT është teknologjia e fundit dhe ne kemi fatin që e kemi më në fund në Shqipëri. Me këtë aparat ne shtojmë edhe një shkallë tjetër sigurie për gjakun duke eliminuar kështu mundësinë e infektimit jo të një personi, por të tre personave, sepse me një sasi gjaku të infektuar ne mund të infektojnë deri ën tre persona. Nga ana tjetër risia e kësaj metodë është edhe periudha e shkurtër e kohës që duhet të presim përgjigjet. Kështu për Hepatitin C periudha dritare shkurtohet në 2.2 ditë, Për HIV në 4.5 ditë dhe për Hepatitin B në 16 ditë. E mira e kësaj teknologjie është ulja e periudhës dritare sidomos për këto infeksione të cilat shkaktojnë kërcënime të jetës së njeriut,” ka pohuar mjekja Rinalda Skëndaj.
Fjala e plotë e Ministrit Beqaj në takim:
Simbolikisht 14 Qershori është Dita Botërore e Dhurimit Vullnetar të Gjakut dhe unë do të shfrytëzoj këtë moment për të ribërë ftesën për të gjithë publikun që të dhurojnë gjak, duke u nisur nga ajo që çdo pikë gjaku që dhurojmë praktikisht vlen për të shpëtuar një jetë, dhe për të gjithë mund të vijë një moment që të kemi nevojë për gjak.
Prej vitesh ka qenë një kërkesë e profesionistëve të kësaj qendre për të rritur cilësinë e analizave që bëhen këtu për sigurinë e gjakut.
Unë kam gjetur në tavolinën e punës përpjekje të nisura edhe para se të bëhesha ministër, por më në fund jam i kënaqur që ne ia dolëm të kurorëzojmë sot fillimin e funksionimit të teknikës që duhet NAT për të zbuluar, siç e tha edhe doktoresha, në një periudhë shumë të shkurtër mundësinë e një infeksioni i cili praktikisht rezultojnë se janë të pranishme në qytetarë të ndryshëm apo në pacientë të ndryshëm.
Këtë vit do të shpenzojmë rreth 70 milion lekë, por për fat të mirë kjo teknologji na mundëson që tashmë të kemi vijimësi në ofrimin e kësaj lloj analize.
Sigurisht dua të falënderoj sot ata që punojnë në këtë qendër (Qendra Kombëtare e Transfuzionit të Gjakut), këmbënguljen e tyre për të rritur cilësinë e shërbimit ndaj qytetarëve shqiptarë, profesionalizimin e lartë. Të falënderoj edhe partnerët tanë të cilët bënë të mundur ofrimin e kësaj teknologjie, por sigurisht falënderimi kryesor shkon sot për të gjithë ata njerëz të cilët dhurojnë gjak dhe janë të gatshëm të vazhdojnë të dhurojnë.
Mjekja Rinalda Skëndaj:
Kjo është një teknologji që mundëson testimin e gjakut për agjentë infektivë siç është Hepatiti B, C dhe HIV.
Teknologjia NAT është teknologjia e fundit dhe ne kemi fatin që e kemi më në fund në Shqipëri.
Me këtë aparat ne shtojmë edhe një shkallë tjetër sigurie për gjakun duke eliminuar kështu mundësinë e infektimit jo të një personi, por të tre personave, sepse me një sasi gjaku të infektuar ne mund të infektojnë deri ën tre persona.
Ky është një aparat që ka një sistem të integruar dhe automatik, pra ndërhyrja e njeriut është minimale, pra çdo proces kryhet automatikisht deri në fund të nxjerrjes së rezultatit.
Bashkë me teknologjinë tjetër paralele që kryejmë për testimin, themi që gjaku në Shqipëri tashmë është i sigurtë.
Nga ana tjetër risia e kësaj metodë është edhe periudha e shkurtër e kohës që duhet të presim përgjigjet. Kështu për Hepatitin C periudha dritare shkurtohet në 2.2 ditë, Për HIV në 4.5 ditë dhe për Hepatitin B në 16 ditë. E mira e kësaj teknologjie është ulja e periudhës dritare sidomos për këto infeksione të cilat shkaktojnë kërcënime të jetës së njeriut. Ajo çka dua të theksoj është se rezultati është i shpejtë dhe i saktë./a.m.
