Leo Messi ka fituar gjithçka me Barcelonën, por trofetë kanë qenë mollë e ndaluar për të me Argjentinën, duke përjashtuar medaljen e artë olimpike më 2008. Katër herë në finale, katër herë i humbur. Ndoshta nuk do t’i ndodhë më, pasi 29-vjeçari ka vendosur të heqë dorë nga kombëtarja e Argjentinës.
Nëse nuk është thjesht një vendim emocional i momentit që mund të ndryshojë në të ardhmen, lojtarin më të mirë të botës nuk do ta shohim më kurrë me fanellën e vendit të tij.
Duke u gdhirë dita e sotme, Argjentina luajti finalen e Copa America Centenario kundër Kilit, të cilën e humbi pas penalltive, me kohën e rregullt e shtesat që përfunduan pa gola. Kili fitoi 4-2 dhe Messi e humbi penalltinë e tij.
“Skuadra kombëtare është më e rëndësishme se unë. Po e marr këtë vendim për veten time dhe për shumë të tjerë që dëshirojnë këtë gjë. Kam punuar shumë, por do të largohem. Kam bërë çfarë kam mundur, është e dhimbshme kur nuk je kampion”, deklaroi Messi pas ndeshjes, duke njoftuar dorëheqjen.
d.i.
