“Ukraina do të fitojë kundër Rusisë dhe do të jetë sërish një vend i lirë”. Kështu u shpreh kryeministri i Mbretërisë së Bashkuar Boris Johnson në një fjalim drejtuar parlamentit ukrainas.
“Unë kam një mesazh për ju sot: Ukraina do të fitojë, Ukraina do të jetë e lirë”, tha ai sipas agjencisë së lajmeve Reuters.
“Ju jeni zotër të fatit tuaj dhe askush nuk mund dhe nuk duhet t’u imponojë asgjë ukrainasve” tha ai nga Downing Street.
Ajo që kishte bërë presidenti rus Vladimir Putin ishte një reklamë për demokracinë, shtoi ai.
“Me pushtimin, Putini mbolli farën e katastrofës”
Në fjalën e tij në parlamentin ukrainas, Boris Johnson thotë gjithashtu se Vladimir Putin “mbolli farën e katastrofës” për veten e tij duke pushtuar Ukrainën.
Duke luftuar kundër Ukrainës “ka ekspozuar marrëzinë historike të Putinit, gabimin gjigant që vetëm një autokrat mund të bëjë”.
“Gabimi i Putinit ishte pushtimi i Ukrainës, dhe kufomat e armaturës ruse që mbushnin fushat dhe rrugët tuaja janë monumente jo vetëm të marrëzisë së tij, por edhe të rreziqeve të vetë autokracisë. Ajo që ai ka bërë është një reklamë për demokracinë.”
Kryeministri Johnson deklaroi se Mbretëria e Bashkuar do të dërgojë më shumë armë në Ukrainë në javët e ardhshme si pjesë e një pakete mbështetjeje prej 300 milionë Paund.
Boris Johnson u thotë deputetëve ukrainas se Mbretëria e Bashkuar do të dërgojë raketa kundër anijeve Brimstone dhe sisteme anti-ajrore Stormer, së bashku me automjete të blinduara, për të evakuuar civilët nga zonat e sulmuara dhe për të mbrojtur zyrtarët.
Paketa mbështetëse do të përfshijë radarë për të identifikuar artilerinë që bombardon qytetet ukrainase, drone të rëndë për të furnizuar forcat ukrainase dhe mijëra pajisje për shikimin gjatë natës, shton Johnson.
Ai thotë se kjo do të ndihmojë qëllimin afatgjatë të Mbretërisë së Bashkuar për të “fortifikuar Ukrainën në mënyrë që askush të mos guxojë t’ju sulmojë përsëri”.
“Të mos ndihmonim Ukrainën në 2014 ishte një gabim”
Johnson tha se Perëndimi bëri një gabim që nuk e ndihmoi Ukrainën në vitin 2014, kur Rusia aneksoi gadishullin e Krimesë të vendit.
“Ne, që jemi miqtë tuaj, duhet të jemi të përulur për atë që ndodhi në vitin 2014, sepse Ukraina u pushtua më parë për herë të parë, kur Krimea iu mor Ukrainës dhe filloi lufta në Donbas. E vërteta është se ne ishim shumë të ngadaltë për të kuptuar se çfarë po ndodhte në të vërtetë dhe ne kolektivisht dështuam të vendosnim sanksionet që atëherë duhej t’i kishim vendosur Vladimir Putinit”, tha ai.
“Ne nuk mund të bëjmë të njëjtin gabim përsëri.”
