Presidenti ukrainas Volodymyr Zelenskyy ka reaguar pas deklaratave të një dite më parë të kreut të Kremlinit, Vladimir Putin, i cili tha se Rusia është e gatshme të negociojë me Ukrainën, por sipas tij nuk ka ndonjë ‘dëshirë’ nga pala ukrainase për të zgjidhur çështjet ligjore.
Në reagimin e tij presidenti ukrainas deklaroi se Putin kishte “frikë” nga negociatat për përfundimin e luftës, pasi presidenti rus përjashtoi mundësinë e bisedimeve të drejtpërdrejta me homologun e tij ukrainas.
“Sot, Putin konfirmoi edhe një herë se ai ka frikë nga negociatat, ka frikë nga liderët e fortë dhe bën gjithçka që është e mundur për të zgjatur luftën”, tha Zelenskyy.
Putin të martën përjashtoi mundësinë që të fliste drejtpërdrejt me Zelenskyy, të cilin ai e quajti “të paligjshëm” për të udhëhequr bisedimet.
“Ju mund të negocioni me këdo, por për shkak se ai është i paligjshëm, ai nuk ka të drejtë të nënshkruajë asgjë. Por nëse ai dëshiron të marrë pjesë në negociata, unë do të ndaj njerëz të përshtatshëm që do t’i kryejnë këto negociata,” u tha Putin gazetarëve rusë.
Për shkak të luftës, Ukraina është nën ligjin ushtarak, gjatë së cilës kushtetuta e Ukrainës nuk lejon zgjedhje. Ukraina ka paralajmëruar që të mos përjashtohet nga çdo bisedë paqeje midis Rusisë dhe SHBA-së, duke akuzuar Putinin se dëshiron të “manipulojë” Donald Trump, presidentin e SHBA.
Ndërkohë dronët ukrainas shënjestruan objektet e naftës dhe energjisë në pjesët perëndimore të Rusisë, raportuan zyrtarët dhe mediat të mërkurën, sipas të cilave një rafineri nafte po digjej në Kstovo në Nizhny Novgorod, në lindje të Moskës. Në rajonin perëndimor të Smolenskut, i cili kufizohet me Bjellorusinë, ka pasur një sulm “masiv” me dron dhe sistemet e mbrojtjes ajrore shkatërruan një dron që kërcënonte një objekt të energjisë bërthamore, tha guvernatori, Vasily Anokhin. Dhjetra dronë të tjerë synuan rajonin Bryansk që kufizohet me Ukrainën dhe rajonin Tver që kufizohet me rajonin e Moskës në jug të tij, thanë guvernatorët rajonalë. Fluturimet u ndërprenë për siguri në aeroportin e Kazanit në Republikën e Tatarstanit, 830 km në lindje të Moskës, thanë zyrtarët.
SHBA transferoi rreth 90 përgjues të mbrojtjes ajrore Patriot nga Izraeli në Poloni këtë javë për t’i dorëzuar më pas në Ukrainë.
Zelenskyy tha se projekte të shumta humanitare në Ukrainë i kishin pezulluar operacionet për shkak të ngrirjes së ndihmës së huaj nga Donald Trump dhe se Kievi do të zëvendësonte fondet aty ku ishte e mundur.
“Sot kam udhëzuar zyrtarët e qeverisë që të raportojnë për ato programe mbështetëse të SHBA-së që aktualisht janë pezulluar. Këto janë programe humanitare. Ka shumë projekte. Ne do të përcaktojmë se cilat prej tyre janë kritike dhe kanë nevojë për zgjidhje tani. Ne mund të sigurojmë një pjesë të këtij financimi përmes financave tona publike. Ne do të mbështesim patjetër pikat prioritare, ato që kanë të bëjnë me fëmijët ukrainas, veteranët tanë dhe programet për të mbrojtur infrastrukturën tonë.”
