Pushohet dosja penale kundër Edi Ramës që ktheu Gjykata e Lartë për tre leje
Dosja penale kundër Edi Ramës për abuzimet me tre lejet ndërtimi e rikthyer 6 muaj më parë nga Gjykata e Lartë për hetime të mëtejshme, është pushuar sërish nga prokuroria. Këtë herë nuk ka qenë prokuroria e Tiranës ajo që ka marrë vendimin por Prokuroria e Përgjithshme, pasi dhe vetë Gjykata e Lartë në vendimin e saj argumentonte duke e gjetur si shkelje ligjore se mbylljen e hetimeve duhet ta kryente Prokuroria e Përgjithshme dhe jo prokuroria e Tiranës, pasi kjo e fundit nuk ka kompetencën për marrje vendimi, kur bëhet fjalë për rastet që të kallëzuarit kanë imunitet.
Kallëzimi kundër kryeministrit Edi Rama është bërë nga ish-nënkryetari i ALUIZN-it Sokol Hasani, i cili në datë 10 prill 2014 i është drejtuar me kallëzim penal prokurorisë së Tiranës, duke e akuzuar Edi Ramën për “Shpërdorim të detyrës” dhe “Korrupsioni pasiv i funksionarëve të lartë shtetërorë ose i të zgjedhurve vendorë”.
Në kallëzimin e tij, shtetasi Sokol Hasani i është referuar një deklarate mediatike të shtetases Jorida Tabaku me datë 11.05.2013 (ish n/kryetare e Bashkisë Tiranë në atë kohë), nëpërmjet të cilës ka akuzuar shtetasin Edi Rama që gjatë kohës së ushtrimit të detyrës së Kryetarit të Bashkisë ka dhënë tre leje ndërtimit të kundërligjshme, firmave të ndërtimit pranë tij dhe në dëm të buxhetit të shtetit. Ky kallëzim është hetuar nga prokuroria e Tiranës dhe më pas është pushuar. Mirëpo gjykata e Lartë ka vendosur që dosjen ta rikthejë sërish për hetim, kjo pasi sipas saj Edi Rama duhet të hetohej nga prokuroria e përgjithshme dhe jo nga prokuroria e Tiranës.
