Ministri i Turizmit, Blendi Klosi, është takuar me homologun e tij grek, Haris Theocharis. Në një postim në rrjetet sociale, Klosi thotë se Theocharis i ka garantuar lëvizjen e lirë në kufi në zbatim të protokolleve shëndetësore antiCovid.
Një lajm shumë i mirë ky për turistët shqiptarë që do të duan të kalojnë pushimet e tyre në shtetin helen në një kohë kur kufiri qëndron ende i mbyllur.
Në postimin e Klosit në rrjetet sociale nuk thuhet data e saktë se kur do të lejohet lëvizja e lirë në kufi, megjithatë, ministri shton se kjo do të bëhet për t’i dhënë frymë dhe mundësi rimëkëmbjes së turizmit.
“Homologu grek, Ministri i Turizmit, Haris Theocharis garantoi lëvizjen e lirë në kufi, në zbatim të protokolleve shëndetësore antiCovid. Kjo, për t’i dhënë frymë dhe mundësi rimëkëmbjes së turizmit”, tha Klosi.
/a.r
