Policia e Tiranës ka arrestuar autorin e dyshuar të vendosjes së lëndës plasëse në lokalin “My House” në Tiranë. Paraditen e sotme, mësohet se në pranga është vënë shtetasi Kadri Çuka, ish-pronari i lokalit. Nga hetimet e para mësohet se ai i maskuar e me kapuç ka hedhur bidonin me lëndën plasëse para lokalit që dikur ishte në pronësi të tijën dhe është larguar.
Si u zbulua autori
Specialistët e Komisariatit të Policisë Nr 3 kanë bërë arrestimin në flagrancë të shtetasit Kadri Çuka, 54 vjeç, banues në Tiranë.
Nga veprimet e para hetimore të kryera dhe analizimit të kamerave në vendin e ngjarjes, ka rezultuar se në orët e para të mëngjesit , në oborrin e këtij lokali një person i maskuar me kapuç në kokë (në dukje i njëjti person me atë të dyshuar), ka ndezur dhe ka hedhur lëndën plasëse të dyshuar si eksploziv dhe më pas autori i dyshuar, është larguar në drejtim të rrugës “Fortuzi”, me një biçikletë.
Nga intervistimi shtetasi Kadri Çuka, ka pranuar se në lidhje me pronën e sipërpermëndur ka pasur një konflikt dhe mosmarveshje me shtetasin M. D. Në këto kushte është ushtruar kontrolli i banesës së këtij Kadri Çukës, ku nga kontrolli ka rezultuar një biçikletë në dukje si ajo e përdorur nga autori i kësaj ngjarje.
Materialet proceduriale i kaluan Prokurorisë pranë Gjykatës së Shkallës Parë Tiranë për veprën penale të “Shkaterrimi i pronës me eksploziv, e mbetur në tentativ”, parashikuar nga Neni 152 dhe 22 i Kodit.Penal.
Konflikti
Dje policia tha zyrtarisht se dyshimet kryesore për bombën artizanale të gjetur në oborrin e lokalit “My House” lidhen me një borxh prej 300 mijë eurosh.
“Nga hetimet paraprake ka rezultuar se bar kafe ‘My House’ është në pronësi të shtetasit Mustaf Deda, pronë të cilën e ka fituar me vendim gjykate, pasi ka qenë në pronësi të shtetasit Kadri Çuka, i cili i ka marr hua shumën prej 300 mijë eurosh.
Këtë shumë, nëse shtetasi Kadri Çuka nuk do t’ia kthente shtetasit Mustaf Deda, atëherë pronën do t’ia jepte këtij të fundit”, tha dje Policia e Tiranës.
Kjo është pista e parë ku janë përqendruar hetimet e Policisë në lidhje me ngjarjen. Mësohet se shërbimet e Komisariatit nr.3 dje kërkuan për të shoqëruar dhe marrë në pyetje ish-pronarin, Kadri Çuka, por ai nuk u gjet. Policia dje sekuestroi kamerat e sigurisë së lokalit dhe të disa bizneseve përreth për të verifikuar pamjet filmike, e për të zbuluar personin që vendosi bombën aty.
ma.me
