Partia Demokratike depozitoi dje në Kuvend kërkesën për mbajtjen e një referendumi mbi çështjen e importit të mbetjeve në Shqipëri. Kërkesën për referendum e kanë firmosur 30 deputetë të opozitës, ndërkohë që pyetja që do të shtrohet për referendum do të jetë “A DUHET TË LEJOHET IMPORTI I MBETJEVE NË TERRITORIN E SHQIPËRISË?”.
Vendimi për kërkimin e një referendumi për çështjen e mbetjeve në Shqipëri u mor në mbledhjen e Grupit Parlamentar demokrat këtë të diel. Ndonëse gjatë mbledhjes së Grupit Parlamentar u ngrit jo pak herë shqetësimi se çështja e riciklimit të mbetjeve nuk është një çështje që i përket të djathtës, deputetët e PD-së e firmosën kërkesën për referendum.
Kështu, ish-ministri Ridvan Bode në mbledhjen e Grupit e cilësoi këtë çështje si kauzë që në botë mbështetet nga e majta. Por në listën e firmëtarëve mungon emri i deputetit Eduard Selami, i cili shprehu rezerva për kauzën e mbështetur në PD.
DEBATI
Kryetari i Grupit Parlamentar demokrat, Edi Paloka, kërkoi gjatë seancës plenare që kërkesa për referendum të miratohet sa më parë. Sipas tij, importi i mbetjeve në vend mund të jetë një rrugë që mund të përdoret nga trafikantët në kushtet kur doganat kanë dhënë prova se mund të kalojnë edhe mallra kontrabandë.
“Lejimi i importit të mbetjeve mund të përdoret nga grupet kriminale për të futur mbetje të rrezikshme. Në kushtet kur vendi ynë nuk kontrollon dot as ushqimet që futen, e bën të pamundur të besosh se qeveria mund të ndalojë futjen në vend të mbetjeve të rrezikshme. Shumë vende kanë interesa për të larguar mbetjet dhe Shqipëria mund të kthehet në shënjestër për të sjellë mbetje të rrezikshme e të parrezikshme dhe afrimin e asaj që njihet si “mafia e plehrave”. Rruga e vetme është ndalimi total i çdo importi mbetjesh. Duke qenë se kërkesa përmbush kushtet e parashikuara në Kushtetutë, kërkojmë që kjo çështje me rëndësi të veçantë të shtrohet për referendum dhe të përfshihet sot në rendin e ditës dhe të miratohet”, tha Paloka.
Ndërkohë në reagimin e tij, kreu i Grupit Parlamentar të PS-së, Gramoz Ruçi, deklaroi se maxhoranca nuk ka votuar asnjë ligj për plehrat në Kuvend. Sipas tij, ligji i ri nuk parashikon as groposje dhe as djegie të plehrave.
“Është e drejta juaj ta bëni opozitën si të doni, por ju flisni për plehra kur nuk ka kaluar asnjë ligj për plehra, por për lëndë të parë për një industri të caktuar. Flisni për djegie e groposje plehrash, kur ligji që kaluam nuk lejon djegie e groposje, por vetëm riciklim. Ligji kufizon në mënyrë drastike pikat nga do të hyjnë, mjetet dhe burimet njerëzore. Bëheni qesharakë kur thoni ne nuk e kemi depozituar kërkesën, por sot ndryshojeni rendin e ditës, sot futeni në rendin e ditës dhe sot votojeni”, tha Ruçi.
ma.me
