Vendimi i Gjykatës Supreme të Shteteve të Bashkuara për të rrëzuar pjesën më të madhe të tarifave doganore të vendosura nga Donald Trump ka një peshë të madhe politike dhe institucionale, përpara se të ketë ndikim ekonomik. Gjykatësit vendosën se presidenti ka abuzuar me pushtetin e tij, duke tejkaluar kompetencat e Kongresit të Shteteve të Bashkuara, i cili sipas Kushtetutës ka rol vendimtar në politikat tregtare.
Në planin afatshkurtër, efektet mund të duken të kufizuara. Administrata amerikane pritet të reagojë duke vendosur tarifa të reja, këtë herë duke u mbështetur në baza të tjera ligjore. Megjithatë, këto masa mund të jenë më të ngushta, ose të kufizuara në kohë dhe produkte të caktuara.
Mesazhi kryesor i gjykatësve, me një vendim të marrë me shumicë 6 vota pro dhe 3 kundër, është i qartë: Autoriteti i presidentit nuk është i pakufizuar. Trump nuk mund të shpallë “emergjenca” në mënyrë arbitrare për të përdorur proteksionizmin si mjet politik, duke anashkaluar parlamentin amerikan.
Ky mesazh institucional do të mbetet, edhe nëse përkohësisht Shtëpia e Bardhë arrin të vendosë tarifa të përgjithshme për disa muaj, duke u justifikuar me deficitin tregtar ose rrethana të tjera. E njëjta logjikë vlen edhe për sektorë të veçantë si çeliku dhe alumini, ku tarifat kanë sjellë kosto shtesë për industrinë amerikane, duke detyruar administratën të mendojë për tërheqje të pjesshme.
Një tjetër pasojë e rëndësishme lidhet me buxhetin publik. Mijëra, ose edhe dhjetëra mijëra kompani, mund të kenë të drejtë për rimbursim nga Thesari amerikan për tarifat që tani konsiderohen të paligjshme. Pas vendimit, vlera e titujve të borxhit amerikan ra, duke rritur koston e huamarrjes. Dëmi për financat publike vlerësohet në rreth 300–400 miliardë dollarë.
Nga ana politike, vendimi i kufizon ndjeshëm manovrat e Trump. Ai nuk do të mund t’i përdorë më tarifat si mjet presioni apo kërcënimi të vazhdueshëm, siç ka ndodhur në rastin e Groenlandës apo kundër Francës, sa herë që politika e një qeverie të huaj e ka irrituar.
Gjykata i ka dërguar një mesazh të drejtpërdrejtë Shtëpisë së Bardhë: Shtetet e Bashkuara janë një republikë me parlament dhe një demokraci liberale. Dhe duhet të mbeten të tilla, me ose pa Trump, para, gjatë apo pas tij. Ky vendim hyn në historinë e Gjykatës së Lartë. Beteja për proteksionizmin në Amerikë, ndërkohë, është ende larg përfundimit.
