Një ditë më parë, vendi u trondi nga një atentat i tipit mafioz ku mbetën të vrarë Juxhin Dautaj dhe Ervin Dalipaj. Këta shtetas u vranë teksa udhëtonin me një mjet luksoz tip “Audi” në rrugën dytësore përbri autostradës Tiranë-Durrës. Të dy këta persona janë të njohur për drejtësinë. Ndërkohë, Ervin Dalipaj, ka shërbyer për 12 vite në Policinë e Shtetit, një karrierë e nisur në moshë të re. Dalipaj, i cili me origjinë është nga Kosva, e ka nisur punën në Tropojë, më pas ka punuar në komisariatin e Rinasit e deri në Drejtorinë e Policisë Tiranë ku i’u besua një detyrë e rëndësishme, ajo e Shefit të Sektorit kundër Krimit Ekonomik.
Në këtë detyrë, ai mbahet mend si efektivi që arrestoi babain e Saimir Tahirit. Por, pas ndërrimit të pushteteve në vitin 2013, ai u shkarkua nga detyra. Dalipaj u procedua nga policia nën akuzën e dekonspirimit të operacioneve kundër lojrave të fatit i njohurt si “Fundi i Marrëzisë” raporton JavaNews.
“Nisur nga konstatimet e bëra për një numër shkeljesh ligjore gjatë operacionit, me urdhër të ministrit Saimir Tahiri, SHKB ka nisur hetimet në të gjithë sektorët e luftës kundër krimit ekonomik, të cilët me mosveprimet e tyre në përmbushje të planit të masave të hartuar nga Drejtoria e Përgjithshme u kanë krijuar mundësinë subjekteve të ndryshme të fshehin aktivitetin e tyre të paligjshëm”, thuhej në një deklaratë të lëshuar nga Ministria e Brendshme, pas shkarkimit të Ervin Dalipajt e disa oficerëve të tjerë.
Emri i Dlaipajt u rikthye në skenë pas disa vitesh. Në fillim të vitit 2016, ai u akuzua për rrëmbimin, torturimin e më pas vrasjen e shtetasit Gazmend Çollaku. Për këtë ngjarje, ai ishte ende në kërkim nga policia./JavaNews/a.m.
